Komisioni i Ekonomisë ka rrëzuar kandidaturën e Petraq Milos për të drejtuar KLSH me votat e mazhorancës. Kandidatura e Milos ishte propozuar nga presidenti Ilir Meta.
Petraq Milo ka qenë sot në seancë dëgjimore në komisionin e ekonomisë. Ai u pyet nga deputetja e PS-së Evis Kushi e cila i ka kërkuar përgjigje për tre pika kandidatit Milo. Ajo i kërkoi se përse mungojnë të dhënat për për detyrën që ka mbajtur nga vitit 1988 deri në vitin 1991.
Sipas Kushit, Milo ka mbajtur një funksion në Bankën e Shqipërisë në kundërshtim me ligjin pasi ka qenë kandidat për anëtar të Këshillit Kombëtar të PD-së. Më tej ajo kërkoi dhe arsyet e dorëheqjes nga posti në BSH.
Milo u përgjigj duke thënë se sipas ligjit në CV duhet të jenë paraqitur 10 vitet e fundit, pavarësisht se ai ka dhënë informacione për 20 vite dhe gjithashtu ka mohuar të ketë dhënë dorëheqjen nga Banka e Shqipërisë.
“Në periudhën 88-91, kam qenë drejtor i drejtorisë ekonomike të kombinatit të autotraktorëve. Funksioni në Bankën e Shqipërisë është para PD. Nuk kam dhënë dorëheqjen nga Banka e Shqipërisë. Në punën time kam qenë model për të qenë bashkëpunues, për të mbështetur çdo qeveri. Nuk ka pasur asnjë qëndrim politik në punën time”, deklaroi Milo.
Këshilltari ligjor i Presidentit të Republikës Bledar Dervishi, deklaroi se tre konstatimet e kuvendit nuk janë të mbështetura në ligj.
Petraq Milo është kandidatura e tretë që mazhoranca i rrëzon Metës për kreun e KLSH. Kandidatura e parë e propozuar nga presidenti Meta ishte ajo e Vitore Tushës, anëtare e Gjykatës Kushtetuese, e cila u refuzua nga parlamenti për shkak të mungesës së formimit në fushën e financave, një kriter bazë për të drejtuar Kontrollin e Lartë të Shtetit. Po i njëjti motiv u ndodh edhe me kandidaturën e Bahri Shaqirit, ish –kreu i SHISH. /Opinion.al
