Mazhoranca qeverisëse e Kryeministrit Edi Rama pas 12 orë debate votoi në parlament me 75 vota ligjin që i hap rrugë shembjes së Teatrit Kombëtar. Ra në sy revolta e ministrit Pandeli Majko i cili pas një debati me Kryeministrin, braktisi votimin mbrëmjen e së enjtes. Opozita brenda në sallë dhe artistët jashtë saj protestuan për shembjen e teatrit, por forca e kartonit veproi: Ligji u miratua!
Tani “topi është në portën” e Presidentit. Thënë ndryshe Ilir Meta do të vendosë nëse do ta dekretojë ligjin e shumë debatuar apo jo. Ndaj tij janë drejtuar thirrje të shumta këto ditë për të kthyer mbrapsht këtë ligj. Po kështu është firmosur një peticion me mbi 4 mijë firma qytetarësh që janë kundër shembjes së Teatrit. Sakaq, dhe dy kryetarët e partive opozitare, Lulzim Basha e Monika Kryemadhi i kanë bërë thirrje Ilir Metës të mos e dekretojë ligjin që i hap rrugë marrëveshjes me një kompani private për të shembur Teatrin Kombëtar në zonën muzeale të Tiranës dhe ngritjen aty të një teatri të ri me disa objekteve të tjera për shërbime tregtare.
Çfarë do të bëjë Meta?
Kushtetuta në nenet 84 dhe 84 të saj, parashikon që Presidenti i Republikës mund të dekretojë ligjin brenda 20 ditëve që është paraqitur nga Kuvendi. Edhe nëse Presidenti nuk shprehet me dekret, ligji kalon dhe hyn në fuqi me botimin në fletoren zyrtare. Përpos dekretimit, apo kalimit në heshtje, Presidentit i njihet e drejta të kthejë për rishqyrtim në parlament ligjin. Burime nga Presidenca thanë se sapo ligji të vijë në rrugë zyrtare do ta shqyrtojnë këshilltarët ligjorë. Po kështu Meta pritet të zhvillojë edhe takime me grupet e interesit.
“Do të vlerësohet nëse ky ligj është hartuar me përputhshmëri me ligjet e tjera ekzistuese në vend”, tha burimi i besuar nga Presidenca.
Neni 85 i Kushtetutës e thotë qartë: “Presidenti ka të drejtë ta kthejë vetëm një herë ligjin për rishqyrtim. Dekreti i Presidentit për rishqyrtim e humbet fuqinë kur kundër tij votojnë shumica e anëtareve të parlamentit”.
Thënë ndryshe, në një rast hipopetik: Nëse Meta e kthen sërish në parlament ligjin për shembjen e Teatrit, është Komisioni i Ligjeve ai që e merr në shqyrtim dhe e paraqet sërish për votim në seancë plenare. Nëse i referohemi afateve kohore; parlamenti mbyll punimet të enjten e fundit të korrikut, sakaq Presidentit do ti duhen 20 dite për tu shprehur. Pra e gjitha kjo mund të shtyhet për në shtator kur rinis punimet parlamenti. Kësisoj, Presidenti Meta, vetëm mund ta zvarrisë procesin e shembjes së teatrit, por nuk mund ta ndalojë atë, pasi mazhoranca i ka votat për ta miratuar sërish ligjin në shtator.
/R.Dedaj-Opinion.al
