Mazhoranca po përpiqet të ndryshojë ligjet e reformës në drejtësi të miratuara me shumicë votash vitin e kaluar. Socialistët propozojnë rikthimin e kompetencave për KLD-në dhe Prokurorinë e Përgjithshme për të emëruar gjyqtarët dhe prokurorët e rinj deri në ngritjen e KLGJ-së e KLP-së.
Ulsi Manja dhe Klotilda Ferhati kanë bërë gati amendimet në ligjin për “PER STATUSIN E GJYQTAREVE DHE PROKUROREVE NE REPUBLIKEN E SHQIPERISE”. Ata i rikthejnë kompetencat drejtueses së prokurorise Arta Marku, kompetenca këto që ishin hequr në kuadër të reformës në drejtësi (kohe kur drejtohej nga Llalla).
Pra, Prokuroria e Pergjithshme dhe Keshilli i Larte i Drejtesise duhet të emërojnë gjyqtarët e prokurorët e e rinj që mbarojnë shkollën e Magjistraturës, deri sa të ngrihen institucionet e reja si KLGJ dhe KLP.
Mosngritja e këshillit të lartë gjyqsor dhe atij të prokurorisë, krahas emërimeve të gjyqtarëve e prokurorëve të rinj, bllokoi dhe punën e Shkollës së Magjistraturës. Janë këto 2 struktura që përcaktojnë se sa do jetë numri studentëve, në varësi të vakancave në sistemin e drejtësisë.
Për këtë arsye 2 deputetet e PS-së shtojnë në ligj dhe dispozita të tjera tranzitore që i lejojnë Shkollës së Magjistraturës që konkursin, që nuk e zhvilloi dot në prill, që ta organizojë atë në tetor, për të pranuar 25 studentë në 2018-n dhe 50 në 2019-n.
3/5 e tyre do të emërohen gjyqtarë dhe të tjerët prokurorë. Paralelisht me ndryshimin e ligjit, që duhet theksuar se ka nevojë dhe për votat e opozitës për t’u miratuar, maxhoranca ka dhe një “plan B”.
Manja e Ferhati i kërkojnë Kuvendit që nëpërmjet një vendimi të ngrejë Komisionin e Pavarur për Koordinimin, Monitorimin dhe Ndjekjen e Zbatimit të Ligjit për Organet e Qeverisjes së Sistemit të Drejtësisë. 5 juristë me përvojë mbi 15 vjecare për llogari të kuvendit do të evidentojnë vonesat dhe shkeljet në zbatimine reformës në drejtësi. Për institucionet që nuk zbatojnë afatet, do të merren masa ligjore nga kuvendi.
/Klan Plus
