Rei Manaj është një lojtar me të ardhme të sigurt, por duhet të mbështetet nga e tërë skuadra pasi nuk mund t’i zgjidhë dot ndeshjet i vetëm. Kështu ka deklaruar trajneri i Peskarës, Masimo Odo, pas ndeshjes së humbur mbrëmë 2-0 përballë Kievos në shtëpi.
“Manaj është një lojtar me të ardhme të sigurt. Nuk është Higuain që i zgjidh i vetëm ndeshjet, por duhet të mbështetet nga e gjithë skuadra. Është një futbollist që nuk mund të luajë në thellësi kundër një ekipi si Kievo, që është mësuar ta mbajë kundërshtarin larg”, komentoi tekniku bardhekaltër.
Edhe pse u detyrua të linte fushën e lojës në minutën e 67-të pas një problemi në kavilje, sulmuesi i Kombëtares shqiptare u vlerësua nga mediat italiane si më i miri i Peskarës në humbjen e mbrëmshme.
