Presidenti i Republikës së Kosovës, Hashim Thaçi, ka mbajtur qëndrim lidhur me vendimin e fundit të kryeministrit në detyrë të Qeverisë së Kosovës, Albin Kurti, për masa të reja të reciprocitetit ndaj Serbisë, të vendosura nga qeveria në mbledhjen e së shtunës. Sipas Thaçit me këto veprime Kurti ka rrezikuar gjithçka Kosova ka arritur në më shumë se dy dekada, duke bërë kështu hapa në kundërshtim me kërkesat e SHBA dhe BE.
“Në përpëlitjet e fundit para se të largohet nga zyra, Kurti po i vazhdon mashtrimet patriotike me vendime strategjikisht të gabueshme. Me vendimin për kinse reciprocitet, ai vazhdoi duke bërë hapa në kundërshtim me kërkesat dhe pritjet e Shteteve të Bashkuara të Amerikës, por edhe të BE-së, duke rrezikuar tërë atë që kemi arritur dhe ndërtuar për më shumë se dy dekada. Kosova ka fituar lirinë dhe shtetësinë me përkrahjen e SHBA-së dhe partnerëve evropianë dhe vetëm me këtë përkrahje e partneritet ka të ardhme të sigurt. Çdo cenim i këtyre raporteve është rrezikim i shtetit dhe rrezikim i së ardhmes së Kosovës”, ka shkruar Thaçi në rrjetin social FB.
Kujtojmë se pas vendimit të Gjykatës Kushtetuese të Kosvës Kurtit i duhet të lërë detyrën, ndërsa i dekretuari Avdullah Hoti ka deklaruar se do t’i shfuqizojë vendimet që pengojnë rifillimin e dialogut me Serbinë./Opinion.al
