Avokati Redi Ramaj thotë në emisionin “Opinion” se drejtësia shqiptare nuk arriti të përcaktonte qartë rrezikshmërinë që paraqiste Ragip Gila, autori i masakrës së ndodhur mëngjesin e së hënës në Shkodër.
Sipas avokatit, përcaktimi i rrezikshmërisë së tij mund të bëhej në momentin kua ai është arrestuar dhe dënuar për lëndë narkotike duke i sekuestruar dhe sende të tjera të jashtëligjshme.
Të gjitha këto sende, sipas tij, mund të përdoreshin nga 29-vjeçari për ngjarje kriminale.
“Duke parë vendimin që ka dhënë gjyqtari në pesë vjet, është një vepër penale në prodhimin dhe shitjen e lëndëve narkotike, e cila ka një marsh dënimi nga pesë në dhjetë vjet. Është dënimi minimal në pesë vjet dhe më pas është zbritur në gjykim të shkurtuar në 3.4. Kjo është një praktikë, e cila për lëndë narkotike aplikohet, por duke e lexuar të plotë vendimin ka disa probleme. Gjatë arrestimit të shtetasit të dyshuar ka kryer vrasjen sot në Shkodër janë gjetur një sërë elementesh, ose sendesh të tjera të rrezikshme duke përfshirë jelekë antiplumb, municion luftarak, maskë silikoni dhe maska të tjera, si dhe paruke. Kuptohet që përdoren në ngjarje ku duhet të kamuflohet ose të fshihet autori. Shohim që problematika nuk nis vetëm me këtë vendim, nis që nga gjeneza, që nga vendimi. Edhe pse ka qëndruar autori në burg, prej një vitit e gjysmë, gjykata i ka pezulluar pjesën e mbetur, por para se të arrinte në këtë moment, duhet që të kishte bërë veprime të tjera hetimore ose gjatë gjykimit, ose në prokurori për të nxjerrë nëse ky person është vërtet i rrezikshëm, apo jo. Mbajtja e maskave nuk është kuptuar asnjëherë. Gjykata në këndvështrimin tim nuk ka vlerësuar saktë rrezikshmërinë e lartë të personit për të dakë në konkulzion. Për këtë ngjarje, 29-vjeçari rrezikon burg përjetë”, tha Ramaj.
