Shqipëria bëhet pjesë e një projekti të madh ndërkombëtar në fushën e energjisë që përfshin partnerë amerikanë dhe grekë. Bëhet fjalë për një projekt që kap vlerën e 6 mld dollarëve për importin e gazit nga Shtetet e Bashkuara drejt Evropës Jugore e që përfshin Shqipërinë në një prej hallkave të saj.
Vlora do të jetë qendra ku do të mbështetet. Këtu pritet të krijohet infrastruktura e nevojshme për importin e gazit i cili do të mbërrijë nga ShBA-të me anije, duke përfshirë vendosjen e mundshme të një Njësie Lundruese të Magazinimit dhe Rigazifikimit.
Kryeministri Rama, e cilësoi këtë marrëveshje si historike dhe një nga projektet që forcon partneritetin me Shtetet e Bashkuara të Amerikës.
“Partneriteti i Shqipërisë dhe SHBA përçon një mesazh: edhe vendet e vogla mund të marrin hapa të guximshëm dhe të bëhen pjesë e zgjidhjes së sfidave më të ngutshme të kohëve tona. mesazhi sot nuk mund të jetë më i qartë kur vjen fjala për të lidhur nevojën jetike për energji me nevojën për liri dhe demokraci: për të mos u mbështetur te aktorë që të ofrojnë energji, por mund të të vënë në pozitë të vështirë me lirinë dhe objektivin për të forcuar demokracinë”, tha Rama.
E pranishme në ceremoninë e nënshkrimit të marrëveshjes ishte edhe ambasadorja amerikane në Athinë, e cila u kujdes të theksonte se me këtë marrëveshje po çon përpara axhendën e presidentit Trump.
“Presidenti Trump ka qenë kampion i zjarrtë i sigurisë energjetike. Administrata Trump e ka ngritur si një shtyllë në mbarë botën. Ndërsa flasim për fuqi rajonale, dua të pranoj rëndësinë e lidhjeve të forta Shqipëri-Greqi. Janë më shumë se fqinje të afërta dhe bashkëpunimi ekonomik. Kur SHBA-të, Shqipëria dhe Greqa punojnë së bashku, i gjithë rajoni përfiton”, tha ajo.
Marrëveshja është firmosur mes kompanisë shqiptare Albgas dhe Venture Global, një kompani amerikane me përfaqësi në vende të ndryshme të botës, që aktivitetin e saj e ka të përqëndruar tek gazi natyror i lëngshëm i prodhuar në Amerikë.
Vetëm pak muaj më parë ajo nënshkroi një marrëveshje për të eksportuar gazin amerikan drejt Evropës së Jugut me një bashkim kompanish të krijuar nga kompania greke e gazit Depa dhe shoqëria Aktor, e njohur në fushën e ndërtimit. Aktor LNG është partneri tjetër në marrëveshjen e firmosur sot në Tiranë.
