Ambasadorja e SHBA në Tiranë, Yuri Kim, mbrëmjen e sotme ka reaguar për nënshkrimin e marrëveshjes për Skavicën, mes kompanisë amerikane Bechtel dhe KESH.
Në një postim në Twitter, Kim shkruan se marrëveshja shënon një përparim të ri në biznes, si dhe e pozicionon Shqipërinë në një eksportues neto të furnizimit të energjisë elektrike.
“Marrëveshja me hidrocentralin Skavica është domethënëse për shumë arsye: shënon një përparim të ri në biznes mes SHBA-së dhe Shqipërisë; do të rrisë furnizimin me energji për ekonominë në rritje të Shqipërisë; dhe pozicionin e Shqipërisë për të qenë një eksportues neto i furnizimit me energji, diversifikimit dhe sigurisë në rajon”, shkruan Kim.
Dy ditë më parë u nënshkrua kontrata për fazën e parë, mes kompanisë Bechtel dhe KESH për projektin e HEC Skavicës. Ky HEC-i do të ndikojë në përmirësimin e situatës së përmbytjeve gjatë dimrit në zonën e nën Shkodrës dhe do të luajë një rol të rëndësishëm edhe për hidrocentralet e tjera ekzistuese në kaskadën e Drinit./Opinion.al
