Kreu i Partisë së Lirisë, Ilir Meta në një deklaratë për mediat, ka folur dhe për marrëveshjen mes Ramës dhe Melonit.
Ish-presidenti e konsideroi ngritjen e kampit të emigrantëve në Lezhë një aventurë personale të kryeministrit Edi Rama .
“Lidhur me marrëveshjen për ngritjen e këtij kampi është tërësisht një marrëveshje problematike që tregon edhe një herë tjetër që Edi Rama përdor kryeministrinë për të ofruar shërbime të karakterit personal.
Kjo është një marrëveshje që bie ndesh me Kushtetutën e vendit. Së dyti, është shumë e qartë se ajo është një marrëveshje që krijon probleme të mëdha sa i takon respektimit të të drejtave të njeriut. Krijon probleme serioze sa i takon sigurisë. Ka sjellë shqetësim jo vetëm në Itali por edhe në BE. Pra është një aventurë e Ramës dhe nuk është ndonjë ndihmë apo solidaritet për Italinë pavarësisht për ta shitur si të tillë. Pra është një aventurë e radhës dhe tregon se politika e jashtme është në dorën e një njeriu që ka zhbërë Kushtetutën dhe Parlamentin”, tha Meta.
