VMRO-DPMNE, pas takimit të së premtes me Ambasadorin amerikan, Xhes Bejli dhe ambasadorit të BE-së, Samuel Zhbigar ka përdorur një gjuhë jodiplomatike në komunikimin me publikun.
Si kurrë më parë, në komunikatat e saj është përcjellë biseda e plotë mes kryetarit të VMRO-DPMNE-së, Nikolla Gruevski dhe dy ambasadorëve.
Siç shihet nga komunikatat Gruevski ka përdorur një ton të pazakonshëm dhe gjuhë të ashpër ndaj ambasadorëve, të cilët takimet i zhvilluan pas protestave të organizuara nga VMRO-DPMNE para Komisionit Shtetëror të Zgjedhjeve, në një kohë kur po shqyrtohehin ankesat e LSDM-së. VMRO-DPMNE ka bërë publike komunikatën në pika të shkurtra:
Bejli: Cilat janë planet e VMRO- DPMNE-së për koalicion?
VMRO DPMNE: Planet varen nga partitë e tjera, të cilat po ndikohen edhe nga faktorë të jashtëm!
Bejli: Cilët janë këta faktorë të jashtëm?
VMRO DPMNE: Nuk jemi të autorizuar të tregojmë!
Bejli: Mund t’ju ndihmojmë në këtë drejtim!
VMRO DPMNE: Puna juaj është vetëm të ndiqni situatën dhe t’i raportoni shtetit tuaj!
Bejli: Ne ju kemi ndihmuar deri tani!
VMRO DPMNE: Për ndihmën e deritanishme, faleminderit!
Bejli: SHBA është mike e Maqedonisë, por disa anëtarë të partisë suaj nuk ndajnë të njëjtin qëndrim!
VMRO: Nuk ka dilema rreth anëtarësimit në NATO e BE dhe miqësisë me SHBA-në, por kjo nuk do të thotë se disa individë, partia apo shteti nuk mund të shprehin mospajtueshmëri me disa hapa që individë të caktuar që përfaqësojnë SHBA-në kanë ndërmarrë këto kohë.
Përveç dialogut, i cili në nëntekstin e tij shfaq mospajtimet mes Gruevskit dhe Ambasadorit Bejli, VMRO- DPMNE ka zhvilluar takime edhe me ambasadorin e BE-së, Samuel Zhbogar. Ish – Kryeministri Gruveski i shprehu shqetësimin zotit Zhbogar se disa përfaqësues nga vendet e Bashkimit Europian po ndërhyjnë në mënyrë të vrazhdë në punët e brendshme të Maqedonisë, çka është nxitur më shumë në periudhën zgjedhore.
Ndërkohë që KSHZ vijon punën për shqyrtimin e ankimimeve të mbetuara nga social demokratët e LSDM-së, mbështetësit e VMRO-së protestojnë përpara selisë për moshapjen e kutive.
