Manjati rus, Alisher Usmanov i ka dhuruar Muzeut Olimpik të Lozanës në Zvicër dorëshkrimin origjinal sipas të cilit janë ndërtuar Lojrat Olimpike moderne.
Usmanov kishte blerë dokumentin 14-faqësh në një ankand në dhjetor të vitit të kaluar për një shumë rreth 8.8 milionë dollarë. Aty është shkruar fjalimi i Pierre de Coubertin në të cilin aristokrati francez ravijëzonte vizionin e tij për Lojërat Olimpike.
Usmanov ka një pasuri rreth 13 miliardë dollarësh sipas Forbes. Ai ka qenë aksioner tek Arsenal deri para pak vitesh, madje pretendent për disa kohë për t’u bërë edhe një prej pronarëve kryesor të klubit anglez të futbollit. Ai gjithashtu mban poston e Presidentit të Federatës Ndërkombëtare të Skermës.
“Pierre de Coubertin kishte një vizion për një botë të bashkuar nga sporti dhe jo të ndarë nga luftërat. Besoj se Muzeu Olimpik është vendi më i përshtatshëm për të mbajtur këtë dorëshkrim të paçmueshëm”, tha Usmanov. /Opinion.al
