Në ditën e rinovimit të kontratës së Yuto Nagatomo deri në 2019-ën, Roberto Mancini ka folur në lidhje me transfertën në fushën e Frosinones, që mund të shuajë përfundimisht ëndrrat e ziakltërve për një vend në Champions.
“Janë akoma edhe 21 pikë në lojë. Duhet të zhvillojmë një ndeshje të rëndësishme për t’u kthyer te fitorja në transfertë (mungon që nga 6 janari, 10 në Empoli). Të dorëzuar për vendin e tretë? Jo, por është e vështirë të mendosh se Roma do të humbasë 8 pikë në shtatë ndeshje”, ka thënë Mancini.
Mbetet fakti se objektivi Champions duket se nuk do të arrihet për shkak të pikëve të humbura me ekipet e vogla “…dhe në shtëpi, – ka shtuar tekniku, – duke paguar shtrenjtë disa gabime. Humbja e disa ndeshjeve të caktuara na ka trembur dhe kur tërhiqesh mbrapa kundërshtari e ka më të lehtë të sulmojë. Duhet të luajmë pa frikë. Për momentin do t’i jepja një notë ulët sezonit. Por jo lojtarëve, që kanë dhënë gjithçka.
Notë të ulët edhe për mua. Toure? Tani duhet të mendojmë vetëm për fundin e sezonit, ka kohë për merkaton. Në futboll mund të ndërtosh një ekip të mirë edhe duke kursyer. Duhet vetëm kohë”.
Mancini ka folur edhe për të ardhmen e tij. “Rinovimi? Sot festojmë atë të Nagatomo, që meriton të qëndrojë te një klub kaq i rëndësishëm.
Nëse do të refuzoja një ofertë nga Premier? Problemi nuk ekziston, duke parë se nuk kam marrë asnjë ofertë… Mos harroni se kam edhe një vit kontratë”. Erick Thohir po përpiqet të bëhet aksionar i një klubi anglez. “Nuk e di nëse lajmi është i vërtetë, por presidenti nuk më ka kërkuar këshilla. Në rast se do t’i duhen, ka bashkëpunëtorët e duhur, të cilët mund ta ndihmojnë më mirë se unë.
