Pas diskutimeve dhe dyshimeve të ngritura në rrjete sociale, lidhur me atë çfarë ndodh brenda spitaleve Covid në vend dhe arsyeve se pse të infektuarve nuk iu lejohen celularët, ministrja e Shëndetësisë, Ogerta Manastirliu, ka publikuar disa pamje brenda spitalit “Shefqet Ndroqi”.
Duke bërë thirrje për mbajtjen e maskës dhe ruajtjen e distancimit fizik, si masa për të shmangur përhapjen e koronavirusit, ministrja thotë se kjo është e vetmja mënyrë që të ndihmohet sistemi shëndetësor për të përballuar pandeminë në Shqipëri.
Në video një prej infermiereve të spitalit thotë se koronavirusi nuk duhet nënvlerësuar pasi shumica e pacientëve të shtruar kanë qenë në gjendje të mirë por tani janë duke luftuar për jetën.
Pamjet vinë pas ngjarjes së rëndë, të mëngjesit të djeshëm, ku një i ri i prekur nga Covid, gjeti vdekjen pasi u hodh nga kati i tretë i këtij spitali.
Por pak para publikimit të ministres, gazetari Erjon Skëndaj raportoi për News 24, se gazetarëve nuk iu lejohet më hyrja brenda ambjenteve të “Shefqet Ndroqit”. Ai u shpreh se ky vendim, vlen vetëm për ta dhe ka ardhur pas ngjarjes tragjike të një dite më parë./Opinion.al
