Një gjykatë separatiste e mbështetur nga Rusia në Donjetsk të Ukrainës lindore dënoi pesë të huaj, të kapur duke luftuar me forcat ukrainase, duke i akuzuar si mercenarë të hënën. Gjykata bëri me dije se tre prej tyre mund të përballen me dënimin me vdekje.
Sipas, agjencisë shtetërore ruse të lajmeve TASS, britaniku John Harding, kroati Vjekoslav Prebeg dhe shtetasi suedez Mathias Gustafsson, të cilët u kapën rreth qytetit të Mariupolit, mund të dënohen me vdekje sipas ligjeve të Republikës së vetëshpallur Popullore të Donetskut.
Ndërsa, dy britanikët e tjerë, Dylan Healy dhe Andrew Hill, do të marrin dënimin maksimal gjithashtu, por nuk do të ekzekutohen. Të pesë të akuzuarit deklaruan se janë të pafajshëm.
Në përgjigje të akuzave ndaj Prebeut, Ministria e Jashtme kroate tha: “Kroacia e hedh poshtë aktakuzën dhe nuk e konsideron atë të bazuar dhe të ligjshme, sepse është në kundërshtim me të drejtën ndërkombëtare dhe konventat ndërkombëtare për trajtimin e civilëve të ndaluar dhe të burgosurve të luftës. ”
Ndërkohë, në qershor autoritetet e Donjetskut dënuan me vdekje dy britanikë dhe një shtetas maroken të kapur duke luftuar me forcat ukrainase kundër Rusisë. Ata u akuzuan nga Rusia si mercenarë.
Qeveritë e huaja kanë refuzuar të negociojnë me Republikën Popullore të Donjetskut, një nga dy entitetet e mbështetura nga Rusia që kanë kontrolluar pjesë të rajonit Donbas të Ukrainës Lindore që nga viti 2014, duke përmendur statusin e saj të njohur ndërkombëtarisht si pjesë e Ukrainës./Opinion.al
