Marrëveshja me Iranin për zgjatjen e armëpushimit dhe rihapjen e Ngushticës së Hormuzit mund të arrihet gjatë javës së ardhshme. Kështu deklaroi Donald Trump në një intervistë për ABC News, duke theksuar se një marrëveshje paqeje mund të jetë më e mirë se një fitore ushtarake.
“Duket se gjithçka po shkon mirë,” tha Trump për ABC News gjatë një bisede telefonike. “Sot pati një pengesë të vogël, por e zgjidha shumë shpejt,” shtoi ai. “Po flasim për një vend vërtet të madh,” tha ai, prandaj “nuk është një gjë e lehtë për ta. Në fakt, nuk është e lehtë as nga këndvështrimi ynë. Por ne po arrijmë atë që duhet të arrijmë.”
Ndërkohë Axios raporton për një bisedë të tensionuar mes presidentit amerikan dhe kryeministrit izraelit Benjamin Netanyahu për shkak të përshkallëzimit të sulmeve izraelite në Liban.
Dje, Irani kërcënoi se do të braktiste negociatat me Shtetet e Bashkuara për shkak të veprimeve të Izraelit në Liban. Sipas Axios, gjatë telefonatës Trump e quajti Netanyahun “të çmendur” dhe e akuzoi për mosmirënjohje.
“Je plotësisht i çmendur. Do të ishe në burg po të mos isha unë. Po të shpëtoj prapanicën. Tani të gjithë të urrejnë. Të gjithë e urrejnë Izraelin për shkak të kësaj”, citohet t’i ketë thënë Trump.
