Luan Baçi, deputeti i Partisë Demokratike në Fier, në një prononcim për mediat ka thënë se votimi për shkarkimin e Lulzim Bashës në një njësi vendore është ndërprerë.
Sipas tij, Policia Bashkiake ka nxjerrë me dhunë komisionin e votimit nga qendra ku po zhvillohej edhe procesi.
Baçi tha se në Cakrat policia ka ndërprerë votimin, duke nxjerrë nga ambientet e njësisë vendore komisionin dhe materialet. Ai tha për “Neës24” se kjo është urdhëruar nga kryetari i Bashkisë së Fierit, Armando Subashi.
“Votimi ka filluar në 8 të mëngjesit. Na njoftojnë tani se para 15 min policia bashkiake ka ndërprerë procesin e votimit në ish-komunën Cakran. Biseduam dje me drejtuesit e kësaj njësie vendore, na lejuan të zhvillonim votimin, ndërsa tani me urdhër të Subashit janë nxjerrë nga policia bashkiake. Është për të ardhur keq. Ta harrojnë se mund të ndërpresin votimin. Anëtarët e PD në Cakran do vazhdojnë procesin e votimit. Ka filluar procesi normalisht, ndërsa tani në 11 pa 10 ka ndërhyrë policia bashkiake. Këtu në Fier ka një pjesëmarrje shumë të madhe” , tha Baçi./Opinion.al
