Ditën e sotme kryetarja e LSI Monika Kryemadhi ka zhvilluar një takim me kryesinë e kësaj partie në Durrës, ku ka folur në lidhje me objektivat e zgjedhjeve të ardhshme.
Kryemadhi ka thënë se përmes LSI do të bëhet ndarja e krimit nga politika, ndërsa shton se kjo parti do të dalë forcë e parë në Durrës dhe “do i thyejë hundët Edi Ramës”.
“Detyra jonë, sfida që kemi nuk është thjesht angazhimi i të rinjve por do punojmë për t’ja kthyer këtë qytet banorëve, për ta ndarë politikën nga krimi, nga baltosja e imazhit të qytetit të Durrësit. Sot qyteti është grabitur nga një grup njerëzish që ka krijuar një situatë problematike për vetë banorët. Të ndezim motorët, të ndahemi në çdo qendër votim, jo thjesht për vota për LSI, por të krijojmë bindjen që Shqipëria është shtëpia e shqiptarëve. Nga Durrësi dhe gjithë Shqipëria ne kemi nevojë për përfshirjen e intelektualëve, profesionistëve që të jenë pjesë e hartimit të qeverisjes nesër. Sot mendojmë që Durrësi ka nevojë për një fytyrë të re, pasi shiu i 25 prillit do ta lajmë baltën e hedhur në Durrës e do rikthejë shkëlqimin e dikurshëm. Do shtrihemi në çdo cep të qarkut, gara do të jetë midis Tiranës, Fierit dhe Durrësit, është garë idesh, jo garë votash. Përshëndes suflerët e kryeministrit të degraduar dhe ju them se këtu jo vetëm që LSI del forcë e parë, por forcë avangarde për të zhdukur krimin e instaluar prej tij, do i thyej hundët Edi Ramës”,- u shpreh Kryemadhi./ Opinion.al
