Partia Lëvizja Socialiste për Integrim si rrallëherë ka sulmuar ashpër kryetarin socialist të bashkisë së Tiranës, Erion Veliaj për çështjen e teatrit kombëtar. Në një postim në facebook, Vasili, pa ia përmendur emrin por duke e nënkuptuar qartë, shprehet se “ç’janë këta kaqola, që na e shpifën me këto numra idiotësh jo 200 mijë andej po 800 mijë këndej. Këta duke u hakmarrë ndaj Tiranës dhe duke shkatërruar trashëgiminë e saj, u duket sikur do shërojnë e qetësojnë komplekset e inferioritet e tyre, pa ditur se po i thellojnë ato”.
Deklarata e plotë e Vasilit në facebook:
Gërmadhat provinciale, që qeverisin dhe urrejnë Tiranën!!!
Tirana është një e tërë. Tirana ka qenë dhe mbetet përfaqësuese e atyre standardeve shoqërore, intelektuale dhe morale, që e levizin përpara vendin.
Ç’janë këta kaqola, që na e shpifën me këto numra idiotësh jo 200 mijë andej po 800 mijë këndej.
Këta gjithë ditën kanë pjesë të broçkullave të tyre krahasimin me Romën, Parisin, Londrën, Vjenën, Barcelonën, etj etj.
Po kanë a dëgjuar këta kaqolët tanë ndonjëherë, që ata burra e gra të mençur dhe pa komplekse, që i drejtojnë ato qytete t’i ndajnë qytetet e tyre në “kaq mijë njerëz na duhen dhe kaq nuk na duhen”.
Idiotësira të tilla vetëm këta tanët në Tiranë mund t’i nxjerrin nga goja.
Këta “budallenjtë” e Europës restaurojnë me merak e dashuri çdo meter mur apo ndertesë, që mban gjallë memorien, kulturën e trashëguar dhe korpusin e vlerave intelektuale.
Ndërsa këta bulimistët politikë, që qeverisin Tiranën shkatërrojnë, e shkatërrojnë, e shkatërrojnë me histeri të papërmbajtur.
Këta të kompleksuarit tanë vuajnë dhe nuk shërojnë dot provincializmin e tyre arkaik, pa ngjyrë, pa moral dhe plot urrejtje për Tiranën, nuk bëhen e nuk bëhen dot qytetarë të saj.
Këta duke u hakmarrë ndaj Tiranës dhe duke shkatërruar trashëgiminë e saj, u duket sikur do shërojnë e qetësojnë komplekset e inferioritet e tyre, pa ditur se po i thellojnë ato.
Ndaj Tirana i përbuz këta, dhe përbuzjen nuk e përcaktojnë numrat, por gërmadhat provinciale të cilat Tirana i bluan, i flak dhe vetëpastrohet prej tyre, siç ka bërë në dhjetëra e dhjetëra vjet, nga ku ka dalë më e shndritshme dhe më e fortë, por edhe më e pastër…..
Deklerata e Veliaj për të ardhurit në Tiranë që nxiti reagimin e LSI
Kritikave të shumë qytetarëve, arkitekteve dhe intelektualëve se projektet e bashkisë së Tiranës për shkatërrimin e stadiumit ‘Qemal Stafa’ dhe Teatrit Kombëtar po i humbin identitetin qytetit, kryebashkiaku Erion Veliaj përpiqet të justifikohet me numrin e lartë të banorëve të rinj që janë vendosur pas viteve 1990.
“Ne, një milion qytetarëve nuk mund t’i themi, shiko, 800 mijë prej jush jeni tepër se ne na ka marrë malli për Tiranën e 200 mijëve. Kjo është jo realiste. 800 mijë njerëzve që kanë ardhur në Tiranë nuk mund t’u themi kthehuni në shtëpitë tuaja, sepse e kanë parë Tiranën si vendin e mundësive; atëherë qyteti zhvillohet me pika të tjera referimi”, tha Veliaj dy ditë më parë.
