11 shoqëri të ujësjellës kanalizimeve kanë aplikuar për rritje tarifash pranë Entit Rregullator të Ujit, ndërkohë që kreu i këtij institucioni Ndriçim Shani thotë se priten edhe të tjerë.
Sipas kreut të ERRU-së në shumë qytete ka hapësira për rritje tarifash, por kreu i Komisionit të Veprimtarive Prodhuese, Niko Peleshi ka kërkuar që kompanitë të mirë menaxhohen për të përmirësuar situatën financiare, duke e parë si hallkë të fundit rritjen e tarifës për të rritur të ardhurat.
Opinion.al gjatë muajit shkurt raportoi se Enti Rregullator i Ujit, në raportin vjetor të 2018 vlerëson se në bazë të të ardhurave të familjeve shqiptare, ata mund të përballojnë një tarifë edhe më të lartë. Por zëvendësministri i Infrastrukturës dhe Energjetikës, Hantin Bonati, tha nuk ka asnjë riaplikim nga bashkitë, për të ndryshuar çmimin e ujit.
“Këto janë baza studimore, nuk janë inicime të rritjes së tarifave në sektorit e furnizimit me ujë. Qëndrojnë si studime për t’u marrë parasysh në të ardhmen. Bashkitë nuk kanë detyrimin për të filluar procedurat për fillimin e rritjes së tarifave të tyre dhe aktualisht sot asnjë nga bashkitë të cilat ka rritur apo rishikuar çmimin vitet e fundit nuk ka një kërkesë për ta rishikuar atë përsëri”, tha Bonati.
Në Shqipëri nuk ka një tarifë të unifikuar për shërbimin e furnizimit me ujë. Secila bashki aplikon një tarifë të diferencuar, miratimi i së cilës kalon nga këshillet bashkiake dhe ERRU, një proces që zgjat rreth 1 vit./Opinion.al
