Në politikë kurrë mos thuaj kurrë. Dhe këtë kryeministri Edi Rama e di shumë mirë. Rasti i fundit, i konfliktit për pronën tek “Petro Nini” pas pamjeve të dhimbshme që u transmetuan bëri që shefi i qeverisë të reagonte, por sipas tij shteti nuk mund të dalë sipër vendimit të gjykatave.
Por cilat kanë qenë qëndrimet e kryeministrit Edi Rama ndër vite…
“Në Shqipëri ka pretendentë për prona dhe pretendime për kthime sa dyfishi i sipërfaqes së vendit tonë. Një absurd që është zhvilluar falë një bande në sistemin e drejtësisë. Një bandë kriminale që ka bërë një kasaphanë duke përdorur çekiçin e gjykatës”, është shprehur kryeministri në korrik të vitit 2015
“Gjykatës që fshihen pas vendimesh kolegjiale që kanë marrë dhe formë të prerë në disa shkallë dhe që në këto kushte aktualisht janë të pandëshkueshëm”, ka thënë ai në Gusht të 2015-s.
“Në 25 vjet jo nuk u bë shtet, por një rrumpallë e paimagjinueshme dhe gjykatat që janë shtylla kryesore e shtetit u kthye në pazare kur e drejta shitej e blihej”, është shprehur në Nëntor të 2016-s kryeministri.
“Kemi qenë këtu kur unë thosha nuk duhet të shtojmë një gjykatë, por duhet të përmbysim një sistem, sepse një gjykatë më shumë do jetë një kasap më shumë ku ju do shkoni dhe do lini lëkurën”, tha ai në Shkurt të 2017-s.
“Për mua është shumë e rëndësishme të jem këtu sot pas më shumë se 15 vitesh luftë për këtë kënd të Tiranës, ku mund të shkruhet një libër për Shqipërinë që kishim. Në këtë truall u ngatërruan të gjitha sëbashku, që nga babëzia deri te korrupsioni i gjykatave”, është shprehur Rama gjatë 2018-s.
E në rastin e fundit, Rama do të deklaronte: “Të trishtueshme pamjet nga rruga e shtëpisë ku kërkohet ekzekutimi i një vendimi gjyqi të formës së prerë. Por e trishtueshme edhe se si Kazani i përzien gjërat pa lidhje! Qeveria s’ka asnjë fuqi mbi vendimet e gjykatave dhe policia e ka detyrim ligjor t’i përgjigjet Përmbarimit”.
Drejtori i Policisë Tiranë u shkarkua e po ashtu edhe një punonjëse e repartit “Shqiponja” sepse protestoi kundër prishjes së banesës, ku ajo e familjarët e saj jetonin prej vitit 1953.
*Për një ngjarje tjetër atë për Dritan Dajtin, pas hetimit që nisi për gjyqtarët, kryeministri do të deklaronte: “Faleminderit me një përulje të thellë shërbëtorëve të shtetit që thyen mitin 30 vjeçar të paprekshmërisë absolute të kriminelëve me toga të zeza. Duke u treguar vrasësve të drejtësisë për 4 policët e vrarë se koha e të paprekshmëve po mbaron, shteti sot ka hyrë në një fazë të re”.
Po ashtu Ministrja e Drejtësisë, Etilda Gjonaj, i ka kërkuar Këshillit të Lartë Gjyqësor ndëshkimin e tre gjykatësve të cilët bënë kalimin e vendimit për Dritan Dajtin nga burgim i përjetshëm në 25 vite heqje lirie për akuzën e vrasjes së 4 policëve në 2009./Opinion.al
