Kryetari i Partisë Demokratike, Sali Berisha deklaroi se do të merret vendim për ngritjen e një auditi sa i takon akuzave për financime ruse në PD, në kohën kur drejtohej nga Lulzim Basha.
Berisha u shpreh ndër të tjera se edhe pse do të ndërmeret auditi, Basha kur ka ikur nga zyra e kryetarit ka marrë me vete hard disqet.
“Do të jem i hapur me ju! Kërkesa për një audit, apo vendimi do të merret, është i drejtë. Do ju informoj. Lulzim Basha ka marrë çdo gjë me vete, hard disqet, gjithçka. Kjo është e vërteta. Partia duhet ta krijojë atë, detyrimisht. Mbi bazën e hetimit, se një qëndrim mendoj unë të dënueshëm ka mbajtur Edi Rama me ndërhyrjen e tij për mbylljen e dosjes. E kam denoncuar këtë, e kam quajtur para jush Lulzim Bashën peng. Kjo u faktua. Demokratët që mbështetën Berishën duhet të ndihen krenar me vendimin e tyre historik, pasi nëse në krye të PD do ishte një kryetar si Basha, ça drame e madhe do ishte”, tha Berisha.
