Debati mbi çështjen e hapjes së negociatave me BE të Shqipërisë dhe Maqedoninë e Veriut ka në qendër të tij faktin nëse do të ndahen ose jo këto dy vende në rrugën e integrimit evropian. Ministri i Brendshëm, Lleshaj është pyetur sot nëse Maqedoni e Veriut ka përparësi në luftën ndaj korrupsionit në nivelet e larta të shtetit duke marrë si shembull edhe arrestimin së fundmi të ish prokurores speciale. Lleshaj ka deklaruar se edhe në Shqipëri është nën hetim ish-prokurori i përgjithshëm duke hequr kështu një paralele mes dy rasteve.
Meqenëse shkuat direkt tek prokurorja, sa di unë edhe këtu është në ndjekje penale ish-prokurori i përgjithshëm”, tha Lleshaj gjatë një deklarate për gazetarët.
Lleshaj zhvilloi sot një takim me homologun e tij maqedonas, Oliver Spasovski.
Sa i përket çështjes së integrimit në tërësi Lleshaj u shpreh se të dyja vendet i kanë përmbushur detyrimet e tyre ndaj BE dhe procesi sipas tij nuk mund të ndahet.
“Detyrat e integrimit europian të Shqipërisë janë përmbushur më së miri dhe kjo është certifikuar nga KE që ka rekomanduar pa kushte fillimin negociatave dhe ne presim që në një kohë të shkurtër negociatat nuk hapen. Nuk ka vendim as për Shqipërinë dhe as për Maqedoninë e Veriut se merret në mes të tetorit. Muaji tetor ende nuk ka ardhur, jemi në fund të gushtit. Shqipëria dhe Maqedonia e Veriut janë në rrugë të padiskutueshme të integrimit, një rrugë që nuk mund të ndahet ashtu si rajoni nuk mund të ndahet” deklaroi ministri Lleshaj. /Opinion.al
