Në konferencën për media të ditës së sotme, Kryeministri Edi Rama foli edhe për deklaratat e zyrtarëve të lartë të BE-së për pastërtinë e listave të kandidatëve për deputetë.
Rama tha se gjatë takimit të djeshëm nuk ka pasur asnjë ultimatum për kandidatët për deputetë në zgjedhjet e 25 Prillit, por vlerësime pozitive për Shqipërië.
“Në Bruksel nuk kam dëgjuar asnjë ultimatum, por vlerësime pozitive për Shqipërinë siç i dëgjuan të gjithë ata që nuk jetojnë në botën paralele të fakteve alternative. Në referencën që ti bëre ka një gabim në objekt sepse faktikisht është një referencë e shkruar e stërdiskutuar në mënyrë të gjatë. Më vjen mirë që koha tregoi që unë kisha të drejtë për Reformën Zgjedhore dhe që Reforma Zgjedhore ka marrë vlerësim maksimal bazuar edhe në opinionin e Komisionit të Venecias që ishte krejt i kundërt i botës paralele të fakteve alternative. Nëse ka pasur në Bruksel diçka që ka kërcitur njësoj siç kërcet një derë e vjetër në sfond kur luhet një koncert ka qenë ndërhyrja e koleges suaj, një ndërhyrje e pavend dhe absolutisht e padobishme për të mos thënë turpëruese për kategorinë e gazetarëve për të gjithë ju dhe për të gjithë ne faktikisht bazuar në fakte alternative të botës paralele dhe një kontrast turpërues për mua që ishte aty në dallim me kolegen tuaj që ishte nga Maqedoninë e Veriut që nuk i ra vendit të vet me baltë të prodhuar nga fabrikat e fakteve të botës alternative.” tha Rama./Opinion.al
