Pas kritikave që Monika Kryemadhi i ka bërë nga Lezha mënyrës se si u zhvillua matura shtetërore, duke kërkuar që të mos përsëriten gabimet e vitit të shkuar, përmes një postimi në rrjetet sociale ka reaguar Ministrja e Arsimit Lindita Nikolli.
Ajo e ka konsideruar praktikën e re të maturës shtetërore, fryt të një pune të përbashkët, ndërsa ka theksuar se vetë kreu i kuvendit ka ndihmuar për zhvillimin e një debati të brendshëm konstruktiv.
Ajo që vihet re në postimin e Nikollit është tonaliteti paqësor i të shprehurit, madje deri diku lutës dhe mirëkuptues, ndërkohë që zonja Kryemadhi, ka qenë më e drejpërdrejtë dhe e fthtë në fjalën e saj nga Lezha, që është zonë elektorale e ministres Nikolli. Ditët e fundit, vihet re sërish një tendosje e raporteve LSI-PS, vecanërisht mbi cështjen e Ministrit të Brendshëm, ndryshe nga sa pritej, që largimi i Saimir Tahirit ta zbiste klimën.
Më poshtë postimi i plotë i Nikollit;
E dashur Monika,
Dëgjova me habi prononcimin tënd kundër praktikës së re të Maturës Shtetërore!
E mirëkuptoj klimën e vigjiljes së fushatës, ashtu siç mirëkuptoj çdo kritikë, edhe nga ti vetë, pavarësisht se jemi shpjeguar jo një herë sy më sy për Maturën Shtetërore. Praktika e re e Maturës Shtetërore që krijoi kushte krejt të reja konkurrueshmërie dhe transparence, është fryt i një pune të madhe e të përbashkët. Siç ti e di fare mirë ka qenë një proces gjithëpërfshirës, ku janë dëgjuar me shumë respekt edhe vërejtjet e grupeve parlamentare, përfshirë dhe LSI-në. Jo vetëm kaq, po vetë Kryetari i Kuvendit ka ndihmuar personalisht për zhvillimin e një debati të brendshëm shumë konstruktiv mes përfaqësuesve politikë dhe ekspertëve të partive të koalicionit.
Asgjë nuk është perfekte dhe gjithshka është e përmirësueshme, padyshim edhe kjo praktikë e re dhe e suksesshme. Por të lutem sinqerisht, të mos cënojmë arritjet tona të padiskutueshme për disa vota më shumë në 18 qershor. Sepse votat kanë rëndësi për partitë, por mostrazimi i nxënësve që po përgatiten për Maturën Shtetërore të këtij viti dhe i prindërve të tyre, ka rëndësi për të gjithë ne, pavarësisht partive.
Miqësisht,
Lindita
