Gazetari amerikan Danny Fenster është lënë i lirë nga burgu në Myanmar pasi u dënua me 11 vjet burg 3 ditë më parë nga një gjykatë ushtarake.
Fenster ishte dënuar për shkelje të ligjit të imigracionit, shoqërim të paligjshëm dhe nxitje kundër ushtrisë duke përhapur frikë dhe lajme të rreme.
Gazetari u shpall fajtor për tre akuza të ngritura kundër tij nga ushtria e Myanmarit, e cila mori kontrollin e vendit në një grusht shteti, më 1 shkurt.
Në fillim të kësaj jave, Fensterit iu shtuan edhe dy akuza shtesë për kryengritje dhe terrorizëm, të cilat parashikojnë një dënim maksimal me burgim të përjetshëm, por aktgjykimi për këto akuza nuk është dhënë ende.
37-vjeçari, Fenster, i cili ishte redaktori menaxhues i faqes në internet Frontier Myanmar, u arrestua në aeroportin ndërkombëtar të Yangon në 24 maj. Ai është një nga dhjetëra gazetarët vendas që janë arrestuar që nga një grusht i shtetit ushtarak në shkurt.
Sipas Frontier, Fenster kishte punuar më parë për Myanmar Noë, një faqe e pavarur lajmesh që ka qenë kritike ndaj ushtrisë që nga grushti i shtetit.
Dënimi i Fenster vjen disa muaj pasi një gazetar japonez i pavarur u arrestua në Myanmar dhe u akuzua për përhapjen e lajmeve të rreme.
Yuki Kitazumi, i cili raportonte për shumë prej mediave kryesore të lajmeve japoneze, ishte një nga gazetarët e pakët të huaj në Myanmar.
Autoritetet e Myanmarit thonë se ai ka shkelur ligjin, por e ka liruar sepse Japonia e kishte kërkuar atë./Opinion.al
