Aktualitet

Liderët politikë në Shqipëri urojnë Pavarësinë e Kosovës


               Publikuar në : 08:17 - 17/02/20 |
Al Do

Kosova feston sot 12 vjetorin e pavarësisë së saj.

Kryeministri Rama nëpërmjet një postimi në Facebook i ka uruar këtë ditë të gjithë shqiptarëve. Në urimin e tij Rama përkujton gjithashtu edhe dëshmorët që luftuan dhe ranë për fitoren e pavarësisë.

Urime ditën e bekuar të Pavarësisë së Kosovës të gjithë shqiptarëve kudo që ndodhen dhe i përjetshëm qoftë kujtimi i atyre që dhanë jetën për këtë ditë”, shkruan Rama.

Kryetari i Partisë Demokratike Lulzim Basha në urimin e tij në Ditën e Pavarësisë së Kosovës e ka cilësuar atë si “ditën e dytë më të rëndësishme të historisë sonë kombëtare”

Këto 12 vite pavarësi nuk kanë qenë të lehta shkruan Basha dhe e ardhmja pritet të ketë sfida. Megjithatë kreu demokrat shprehet se “sot në krye të opozitës e nesër në krye të qeverisjes së vendit, Kosova dhe aspirata jonë e përbashkët drejt integrimit do të jetë misioni ynë i madh”.

Presidenti i Republikës, Ilir Meta ka zgjedhur ta bëjë në mënyrë zyrtare urimin e tij duke i dërguar një letër urimi homologut të tij në Kosovë, Hashim Thaçi.

Meta shkruan se Kosova ka hyrë në një etapë të re të konsolidimit të shtetit dhe uron që kjo të shoqërohet me një hov të ri edhe në marrëdhëniet vëllazërore dhe bashkëpunimin ndërmjet Shqipërisë dhe Kosovës.

Ai thekson se Kosova tashmë ka hyrë në dekadën e dytë si shtet i pavarur dhe nënvizon se integrimi euro-atlantik dhe njohja në arenën ndërkombëtare duhet të mbizotërojnë në rrafshin e objektivave strategjike.

Në mënyrë zyrtare ka zgjedhur të përcjellë urimin e tij dhe kreu i Kuvendit, Gramoz Ruçi. Në letrën e dërguar Kryetares së Kuvendit të Kosovës, Vjosa Osmani, ai thekson se pavarësia është realizimi i aspiratave të vëllezërve kosovarë, luftës dhe sakreficave të UÇK-së dhe mbështetjes së pashembullt të aleatëve të mëdhenj të Kosovës dhe të të gjithë shqiptarëve, Shteteve të Bashkuara të Amerikës, NATO-s dhe Bashkimit Europian

Kryetarja e LSI-së Kryemadhi ka uruar në Facebook se në këto 12 vite Kosova ka “shënuar arritje me përmasa epokale po të kemi parasysh se sa shumë luftë e përpjekje, sa shumë sakrifica dhe privacione janë dashur të përballohen”.

Ajo shpreh gjithashtu mirënjohjen për Shteteve te Bashkuara te Amerikës, Britanisë së Madhe, Gjermanisë, “që ishin krah Kosovës si në ditët e luftës së përgjakshme, ashtu edhe në procesin politik për shpalljen e pavarësisë së saj”. /Opinion.al

Pas