Skuadrat e futbollistëve të kombëtares shqiptare të futbollit kanë qenë sot protagonistë në fushën e lojës në Serinë B italiane. Ajo që pritej me interes ishte ndeshja e parë e Berat Gjimshitit me fanellën e Avelinos, ku u huazua vetëm pak ditë më parë nga radhët e Atalantës.
Mbrojtësi i përfaqësueses shqiptare zhvilloi një ndeshje të mirë në këtë sfidë përballë Trapanit, sidomos në pjesën e parë, duke bërë disa ndërhyrje vendimtare ndaj sulmuesve kundërshtarë, ndërsa edhe rrezikoi portën e miqve me një gjuajtje me kokë pas një goditje standarde. Megjithatë, ndeshja në fjalë u mbyll pa gola dhe për Avelinon kjo ishte hera e parë në këtë kampionat që e mbyllte ndeshjen me rrjetën e paprekur..
Migjen Basha ka qenë në stolin e rezervave gjatë të gjithë takimit që Bari luajti kundër Viçencës, të mbyllur pa gola. Mesfushori nuk është në formën më të mirë, ndaj trajneri Stelone ka vendosur ta lërë në stol deri sa të arrijë gjendjen e kërkuar fizike.
