Ledina Mandija do të jetë zv/kryeministrja e vendit. Zonja që do të ulet në qeveri pranë Edi Ramës ka një histori të vjetër përplasjes ligjore me institucionit ku sot shkon të drejtojë si numri 2.
43 vjecarja ka qenë Avokate e Shtetit në qeverinë Berisha dhe u shkarkua sapo drejtimin e qeverisë e mori Edi Rama. Ledina Mandija ka mbajtur detyrën e Avokatit të Shtetit nga viti 2007 deri më 7 tetor 2013, kur kryeministri Edi Rama ka firmosur largimin nga detyra.
Asokohe ajo ka dorëzuar në Gjykatën Administrative padi ndaj Ramës ku ajo kërkon rikthimin në detyrë dhe dëmshpërblimin me paga për kohën që ka qenë pa punë.
Padia e Mandijës ka kaluar në një kalvarë të gjatë dhe ka përfunduar edhe në Gjykatën e Lartë.
Kjo sepse: Avokatura e Shtetit (e qeverisë Rama) ka kërkuar nxjerrjen e çështjes jashtë juridiksionit gjyqësor, pra që Administrativja të mos e shqyrtonte padinë e të shkarkuarës. Në shkallën e parë ka fituar Mandija dhe padia e shtetit është rrëzuar. Në shkallën e dytë, Administrativja e Apelit e ka rrëzuar vendimin e shkallës së parë duke pranuar ankesën e Avokaturës së Shtetit kundër Mandijës. Kështu, çështja ka përfunduar në Gjykatën e Lartë ku Ledina Mandija e ka fituar përballjen proceduriale me Edi Ramën. Në këtë pikë, çështja është kthyer sërish në Administrative.
Mandija u bë e njohur për publikun kur u thirr si dëshmitare në Komisionin Hetimor për CEZ. Mandija ka filluar punë në Avokaturën e Shtetit si Avokate e Shtetit më 6 prill të vitit 2007, në pozicionin e Avokates së Shtetit për Arbitrazhin Ndërkombëtar. Në janar të vitit 2010 është emëruar nga kryeministri Berisha në pozicionin e Avokatit të Përgjithshëm të Shtetit. Në datën 7 tetor të vitit 2013, me urdhrin e Edi Ramës është liruar nga detyra e Avokates së Përgjithshme të Shtetit.
