Mediat iraniane dhe mbështetësit e linjës së ashpër të udhëheqjes fetare të vendit përshëndetën sulmin e së premtes në shtetin e Nju Jorkut ndaj shkrimtarit Salman Rushdie, i cili është përballur me kërcënime me vdekje nga Teherani për më shumë se tre dekada.
Rushide u godit disa herë me thikë në qafë të premten gjatë një leksioni të hapur që po mbante në qytetin Chautauqua, në New York . Sipas agjentit të tij, Rushdie është lidhur me një ventilator dhe mund të humbasë një sy për shkak të sulmit. I dyshuari është arrestuar nga forcat e rendit.
Rushdie ka jetuar nën kërcënim që kur lideri revolucionar iranian Ayatollah Ruhollah Khomeini lëshoi një fetva, ose dekret fetar, duke bërë thirrje për të vrarë autorin me origjinë indiane për librin e tij të vitit 1988 “Vargjet Satanike”, të cilin disa muslimanë e konsideruan si mosrespektim të profetit Muhamed.
Pas goditjes me thikë, një citim i liderit suprem aktual të Iranit, Ayatollah Ali Khamenei, duke thënë se fetvaja ishte “qëlluar si një plumb që nuk pushon derisa të godasë objektivin e tij”, u shpërnda gjerësisht në mediat sociale, sipas The New York Times.
“Kjo meriton përgëzime: Dashtë Zoti, ne do të festojmë së shpejti kalimin e Salman Rushdie në ferr,” citohet të ketë postuar në Twitter eksperti konservator Keyvan Saedy.
Gazeta ultra-konservatore iraniane Kayhan përshëndeti të shtunën sulmuesin që sulmoi Rushdie.
“Bravo për këtë njeri të guximshëm dhe të ndërgjegjshëm që sulmoi të shthururin Salman Rushdie në Nju Jork”, shkruante gazeta, shefi i së cilës emërohet nga Khamenei. “Le t’i puthim duart atij që theri qafën e armikut të Zotit me thikë”, shtoi e përditshmja.
Ndërsa, gazeta konservatore Khorasan mbante një imazh të madh të Rushdie me titull: “Satani në rrugën për në ferr”.
Po ashtu, gazeta e lajmeve Eghtesad Salem botoi një shkrim duke thënë se sulmi me thikë u dërgoi një mesazh zyrtarëve amerikanë se ata do të gjurmoheshin për vrasjen e gjeneralit të lartë iranian Qassem Soleimani në janar 2020, duke përmendur në mënyrë specifike ish-presidentin e SHBA Donald Trump dhe ish-sekretarin e shtetit, Mike Pompeo.
“Zbatimi i urdhrit për vrasjen e Salman Rushdie 33 vjet pasi u lëshua u dërgon një mesazh zyrtarëve amerikanë se ata duhet t’i frikësohen hakmarrjes së Iranit për gjeneralin Qassem Soleimani, deri në vdekjen e tyre, edhe nëse hakmarrja zgjat 33 vjet,” thuhet në shkrim.
Autoritetet iraniane nuk kanë bërë ende ndonjë koment zyrtar mbi sulmin me thikë kundër Rushdie.
Ndërkohë, në Teheran, disa qytetarë të gatshëm për të folur për Associated Press shprehën lavdërime për sulmin ndaj shkrimtarit që sipas tyre njolloste besimin islam.
“Unë nuk e njoh Salman Rushdie, por jam i lumtur të dëgjoj se ai u sulmua pasi ai ofendoi Islamin,” tha Reza Amiri, një 27-vjeçar.
“Ky është fati i kujtdo që fyen shenjtërinë.” Mohammad Mahdi Movaghar, një 34-vjeçar banor i Teheranit, përshkroi se kishte një “ndjenjë të mirë” pasi pa Rushdie të sulmuar. “Kjo është e pëlqyeshme dhe tregon se ata që fyejnë gjërat e shenjta të ne muslimanëve, përveç dënimit në ahiret, do të ndëshkohen edhe në këtë botë nga duart e njerëzve”, tha ai.
Të tjerë, megjithatë, shqetësoheshin se sulmi pavarësisht pse u krye mund të dëmtonte Iranin ndërsa përpiqet të negociojë mbi marrëveshjen e tij bërthamore me fuqitë botërore. “Kjo do ta bëjë Iranin më të izoluar,” paralajmëroi ish-diplomati iranian Mashallah Sefatzadeh./Opinion.al
