Tifozët e futbollit janë mësuar ta shohin vetëm me një ekip… Barcelonën. Dhe lajmi që Leo Messi do të largohet padyshim që i tronditi të gjithë, megjithatë ka ende disa persona që shpresojnë që kjo të jetë një blof i klubit katalanas. “Diçka po zien”, shkruan një faqe e dedikuar për lajmet e Barcelonës. Por se çfarë po zien, askush nuk mund të ta thotë. Megjithatë në analizë marrin njoftimin e Barcelonës.
“Pavarësisht se arritëm një marrëveshje me qëllimin e qartë për të rinovuar kontratën, kjo nuk mund të realizohet për shkak të pengesave financiare dhe strukturore (rregullat e Ligës spanjolle). Si rezultat i situatës, Messi nuk do të qëndrojë me Barcelonën. Të dyja palët janë të keqardhura pasi dëshirat si të klubit, ashtu dhe të lojtarit, nuk u përmbushën. Barcelona i shpreh mirënjohjen më të madhe lojtarit për kontributin dhe i uron më të mirat në të ardhmen në jetën personale dhe profesionale”, thuhej në deklaratë.
Pikërisht sipas skeptikëve në këtë deklaratë shprehet kapaciteti i përbashkët për të vazhduar kontratën, por në fund nuk realizohet dot. Kjo nuk është dëgjuar më parë. Po ashtu njoftimi është i shkurtër, pa merita të mëdha ndaj lojtarit, pa statistika, thjesht mirënjohje.
“Nëse nuk do e dije që është Messi do mendoje që është duke u larguar një lojtar i thjeshtë. Shumë e çuditshme”, shkruhet në faqe.
Ajo çfarë i habit tjetër skeptikët është se askush nuk ka dalë në deklarata. Messi, Presidenti Laporta dhe futbollistët nuk kanë thënë asgjë. Heshtje totale. Dhe më e çuditshme, por në fakt aty mund të lidhen të gjitha gjërat është fakti se afati i regjistrimit të lojtarit nuk skadon sot e as nesër, por në fund të muajit.
Pra skeptikët ndalen tek fakti i problemeve ekonomike siç dihen dhe shkurtimet që duhet të bëjnë në paga ndikuar nga rregullat e La Liga-s. Nëse do të ishe president i Barçës gjëja e parë që do bëje është rinovimi i Messi-t. Pse? Sepse përveç aftësive profesionale ai mban fansat në stadium dhe para televizionit.
Por fundja pse Barça do ta bënte këtë? Ajo që dihet me siguri është që ndaj Laporta-s nuk ka më presion, por topi ka kaluar në anën e La Ligës. “Telefonat do jenë duke rënë në mënyrë të çmendur. Interesa të mëdha parash pyesin se pse lojtari dhe klubi duan marrëveshje, por në fund ylli i klasit botëror duhet që të largohet nga liga?”, shkuhet më tej.
Mesa duket ky është blofi i fundit që synon të kryejë Barça për të mbajtur Messin. Në lojë janë interesa të mëdha. Ajo që mund të kuptohet është se diçka po zien, por se për çfarë bëhet fjalë vetëm ditët në vijim do ta tregojnë më qartë. /tvklan.al
