Kadastra e Vlorës ka ndërruar që prej shtatorit 7 drejtues duke lënë të kuptohet se është bërë një institucion i pa menaxhueshëm për gjithë problematikat që ka me regjistrimin e pronave në bregdetin e jugut.
Kreu i Kadastrës, Artan Lame, ndërsa foli për mediat nga Himara, deklaroi se Kadastra e Vlorës është institucioni më problematik në vend dhe se së shpejti do dëgjohen sërish lajme për të.
“Kadastra e Vlorës është institucioni më problematik në vend. Ne po heqim kusuret e 25 vjetëve tallje me njerëzit. Për këtë arsye procesi i regjistrimit në jug nuk po bëhet nga Kadastra e Vlorës, por nga ekipet tona të Tiranës. Sa i përket Kadastrës së Vlorës, së shpejti do të dëgjoni sërish lajme”, tha Lame.
Sa i përket procesit të regjistrimit të zonave kadastrale në bregdetin e jugut Lame kritikoi shtetin i cili për 30 vjet nuk e kishte mbyllur këtë proces dhe theksoi se ai nuk mund të realizohet pa u bërë të gjithë bashkë.
Lame deklaroi se qeveria aktuale e ka marrë seriozisht këtë proces por kërkoi nga ana tjetër edhe frymën e bashkëpunimit me qytetarët. Në fund të këtij procesi ai tha se do të kemi tre kategori. Ata që do të pajisen me certifikatë dhe nuk kanë konflikte për pronën, ata që kanë konflikte por që do të gjejnë një zgjidhje me njëri-tjetrin dhe ata që nuk kanë gjetur zgjidhje në konflikt dhe që duhet t’i drejtohen gjykatës.
“Ka 30 vjet që shteti shqiptar, ku më shumë e ku më pak, nuk ka qenë në gjendje të mbyllë problemin e pronave, kryesisht në jug. Janë gjithë zonat kadastrale të bregdetit të jugut ende të paregjistruara. Dy herë është nisur ky proces, të dyja herët ka dështuar. Njëherë u nis dhe u la në mes, herën tjetër u çua më tej, por u la sërish, edhe pse ishte me financime të huaja. Ju them me bindje se kjo do të jetë hera e tretë ku procesi i regjistrimit të pronave në jug do të përfundojë. Por, ky proces nuk mund të bëhet pa u bërë të gjithë bashkë. Po nuk u krijua fryma e bashkëpunimit dhe fryma që shteti, me gjithë problemet që mund të ketë, e ka marrë seriozisht këtë, nuk mund të shkojë përpara. Besoj që do të mbyllet në këto muaj që është lënë si proces.
Për rreth dy-tre muaj ne do të vazhdojmë me grupet në terren për të bërë mbledhjen e informacionit, pastaj do të përpunohet në zyrat tona dhe do të shfaqet për dy-tre muaj të tjerë pranë gjithë zyrave tona në bregdetin e jugut dhe do t’i lihet afat dy-tre muaj çdo qytetari të shohë si është pasqyruar prona e tij.
Do të kemi tre kategori, o qytetarë që kanë pronën e pastër dhe do të marrin çertifikatën e pronësisë, o qytetarë që kanë probleme me njëri-tjetrin dhe arrijnë ta gjejnë zgjidhjen me njëri-tjetrin dhe do të regjistrohen të dy palët dhe do të marrin çertifikatën, o qytetarë që kanë probleme me njëri-tjetrin dhe nuk e gjejnë zgjidhjen dhe do iu thuhet të shkojnë në gjykatë”, tha Lame. /Opinion.al
