Ka përfunduar takimi prej më shumë se tre orësh ‘kokë më kokë’, mes kryeministrit Edi Rama dhe kreut të PD-së Lulzim Basha, në Kryesinë e Kuvendit.
Kreu i Partisë Demokratike, Lulzim Basha ka deklaruar se ka një marrëveshje të bazuar në paketën “McAllister plus”, ndërsa theksoi se ditën e nesërme do bëhet publike marrëveshja.
Basha theksoi se marrëveshja do të bëhet e detajuar dhe e qartë në 24 orët e ardhshme. Edhe Rama është shprehur se nuk ka se çfarë të shtojë më shumë.
Më pas, Rama dhe Basha, kanë shtrënguar duart para kamerave.
(Momenti i shtrëngimit të duarve)
Pas takimit gjithëpërfshirës, në sallën “Pjetër Arbnori” në Kryesinë e Kuvendit është zhvilluar takimi mes kryeministrit Rama dhe kryeopozitarit Basha.
Takimi ka nisur pas tryezës së kryetarëve të partive, rreth orës 22:00 në mjediset e Kryesisë së Kuvendit.
Rama dhe Basha u takuan ‘kokë më kokë’ kur mbeten edhe pak orë nga skadimi i afatit të fundit që kreu i qeverisë i vendosi opozitës për të hyrë në zgjedhje.
Kërkesa ka ardhur në takimin mes kryetarëve të partive, të mbajtur në Kryesinë e Kuvendit, ku të pranishëm ishin Rama dhe Basha.
Aleatët ishin ata që dhanë shenjat e para të marrëveshjesh. Shpëtim Idrizi e ka quajtur një bisedë racionale, duke lënë të kuptohet që po shkohet drejt një marrëveshjeje.
Por edhe krerët e partive të tjera që folën më herët lanë të kuptohet e njëjta gjë. Pas takimit të thirrur nga krerët e partive të vogla, deputetja Mimoza Hafizi dha pak detaje nga tryeza e bisedimeve, por tha se një takim mes Ramës dhe Bashësh po zhvillohet “tet a tet”, në Kryesinë e Kuvendit.
(Pak çaste para fillimit të tryezës së partive)
Ja çfarë thanë disa prej krerëve të partive të vogla sapo dolën nga takimi në Kryesinë e Kuvendit të Shqipërisë:
Idrizi: PDIU i qëndron faktit që paketa McAllister është një paketë e plotë dhe i jep opozitës të gjitha garancitë.
Është një diskutim që po bëhet edhe për datën dhe mendoj që data 16 korrik arrin të ezaurojë të gjitha problematikat që paraqet opozita. Unë bëra thirrje për një mundësi që ta gjejmë gjuhën e përbashkët. Shpresoj shumë që ky takim që po vazhdon midis z.Basha dhe Z.Rama të gjendet një zgjidhje.
Kishte një kundërpropozim të zt.Rama që ishte pak më i ndryshëm por në fund fare arriti t’i jepte garanci opozitës. Ne do ta mbledhim Parlamentin nga Vettingu dhe pastaj nga ndryshimet e tjera. Besoj shumë që zt.Rama dhe Basha të jenë në lartësinë e përgjegjësisë. Nga gjithë qëndrimet në tryezë u pa e nevojshme për një takim mes zt.Rama dhe zt.Basha.
Vasili: Patëm mundësi të zhvillomin një dialog më të gjerë. Ishte një nismë e dobishme, pasi u njohëm në mënyrë të detajuar për produktin e negociatave mes PS-së dhe PD-së. Ne vazhdojmë të jemi të bindur dhe të palëkundur se paketa McAllister duhet zbatuar pikë për pikë. Ishte një paketë që duhej pranuar që në momentin që u bë publike. Asnjëherë nuk është vonë.
Ajo është një bazë shumë e mirë racionale, krijon besim për të pasur zgjedhje të lira dhe të ndershme.
Mediu: Qartësisht në tryezë kemi pozicione të përafërta por dhe pozicione të ndryshme, opozita në mënyrë të qartë ka theksuar se ka miratuar pa asnjë kusht paketën nga Yee dhe Ambasadori Lu. Kjo paketë është McAllister dhe propozimet e tjera të integruara. Po ashtu kemi theksuar se nuk kemi debat për asnjë çështje. Kemi parë një vullnet të mirë nga pjesa tjetër e partive poltike me përjashtim të zoti Rama për ta parë si një paketë funksionale. Opozita është e gatshme ta implementojë këtë paketë nga pika e parë tek e fundit. Që nesër të mblidhet Parlamenti, të bëhen ndryshimet ligjore të domosdoshme për ta bërë të implementueshme këtë paketë. Ky është qëndrimi i opozitës në mënyrë që tu japim mundësi shqiptarëve që të shkojnë në një proces zgjedhor që nuk komandohet nga politika por nga vota e tyre. Nuk ka asnjë qëndrim dhe as një qëllim tjetër.
Hafizi: Dialogu ende nuk ka përfunduar por ne si LIBRA i mbetemi pozicionit të standarteve zgjedhore. Ne kërkojmë që kjo krizë politike të mbyllet me përmirësimin e standarteve zgjedhore, insistojmë tek numërimi elektronik si kusht themelor që zgjedhjet e ardhshme të jenë më të mira se ato pararendëse dhe këtë e kemi kërkuar./Opinion.al
