Afrimi i 30-qershorit duket se thellon edhe më shumë krizën politike, pavarësisht apelit ndërkombëtar për dialog. Kërkesa e kryebashkiakëve të forcave opozitare drejtuar KQZ-së për lirimin e ambienteve të përcaktuara për Komisionet Zonale të Administrimit Zgjedhor, pas vendimit të presidentit Ilir Meta për anulimin e datës 30 qershor, duket se ka rritur tensionet.
Kryebashkiakja e Shkodrës, në një konferencë për mediat tha sot se qeveria po nxit konfliktin civil. Sipas Voltana Ademit, në ushtrim të detyrës se vet ligjore, punonjësit e Policisë Bashkiake kanë marrë masat për të ruajtur objektet nën pronësinë dhe administrimin e Bashkisë Shkodër. Bëhet fjalë për godinën ku është vendosur KZAZ-ja Shkodër.
“Por gjatë ushtrimit te detyrës, punonjësit e Policisë Bashkiake, janë shantazhuar nga disa persona civil, qe janë prezantuar si punonjës se Policisë së Shtetit. Ata nder të tjera i kanë kërkuar verbalisht, që në orën 15:30 te paraqiten në zyrën e oficeres së policisë gjyqësore Sulela Gerxhaliu. Ky është një veprim i paligjshëm dhe që nxit konflikt. Ky është një veprim që i trajton zyrat e shtetit si sekretar privat te Edi Rames dhe punën shtetërore si punë partie. Nëse organi i prokurorisë ka ndonjë kërkese ligjore lidhur me veprimtarinë e Bashkise Shkodër, i kërkoj zyrtarisht të na informoje. Bashkia Shkodër është e vendosur të zbatoje ligjin dhe i kërkon Policisë dhe sipas rastit prokurorisë, te ndal menjëherë provokimin, ndaj Bashkisë Shkodër. Nxitja e konfliktit nga vartësit e Edi Rames nuk i shërben stabilitetit te vendit. Si Kreytare e Bashkisë së Shkodrës jam e vendosur të zbatoje Dekretin e Presidentit te Republikës për shfuqizimin e datës 30 Qershor”, tha Ademi.
Në të gjitha qytetet KZAZ-të janë marrë në mbrojtje dhe ruhen nga oficer të policisë së shtetit. Janë 27 bashki të drejtuara nga tre parti të opozitës që i kërkuan një ditë më parë Komisionit Qëndror të Zgjedhjeve lirimin e ambienteve të KZAZ-ve dhe heqjen e listave të zgjedhësve.
Kjo si detyrim pas dekretit të Presidentit për të shfuqizuar 30 Qershorin di datën e zgjedhjeve lokale. Por KQZ e cilëson si nul dekretin e Presidentit dhe ka kërkuar vijimin e punës për procesin zgjedhor./ Opinion.al
