Presidenti Ilir Meta ka deklaruar se Kuvendi duhet të vetëshpërndahet dhe se institucionet më të rëndësishme të vendit po rrezikojnë delegjitimim të plotë dhe për këtë kanë faj edhe ndërkombëtarët.
Në një intervistë për Euroneës Albania, Meta bëri deklarata të forta në drejtim të Kuvendit por edhe ndërkombëtarëve.
Ai iu rikthye dhe njëherë çështjes së Gjykatës Kushtetuese duke thënë se ajo po tentohet të kapet nga mazhoranca duke sabotuar reformën në drejtësi.
“Kjo është një drejtësi e vdekur. Unë nuk luftojë për një Gjykatë kushtetuese të Ilir Metës. Unë po mbroj një Gjykatë Kushtetuese me integritet. Ata bënë një lojë të trashë që nuk ka diplomat të korruptuar në Bruksel, Uashington për të relativiziuar përgjegjësinë e z. Dvorani. Ka shpërdoruar detyrën dhe ka përvetësuar kompetencën e tjetër kujt”, tha Meta duke nënvizuar se përgjegjësinë kryesore për këtë e ka kryeministri Rama por Meta shtoi se këtu kanë luajtur rol edhe ndërkombëtarët.
Ai etiketoi me ironi si “heroinë të reformës” ish-ambasadoren e BE-së në Tiranë, Romana Vlahutin dhe shefen e misionit të Euraliusit Agnes Bernhard. Meta tha se, zyra e BE në Tiranë ka përgjegjësi për kapjen e reformës në drejtësi nga mazhoranca qeverisëse.
“Kjo është një çështje mjaft evidente, ata kanë humbur mundësitë për të luajtur rolin e tyre që reforma të bëhej siç është në Kushtetutë. Përgjegjësia e tyre është shumë e madhe. Por nuk dua t’i hyj kësaj çështjeje, unë kam qenë mjaft bashkëpunues me të gjithë”, deklaroi Presidenti.
Parlamenti sipas tij është jashtë standardeve kushtetuese dhe i deligjitimuar dhe në këto kushte Meta tha se bën mirë të vetshpërndahet.
“Unë mendoj që ky kuvend që bën veprime të tilla që po fton me shpejtësi të madhe delegjitimimin e të gjitha institucioneve, e vetmja punë e mirë që duhet të bëjë është të vetëshpërndahet. Parlamenti është jashtë standardeve të Kushtetutës se duhet të kishte 140 deputetë. Zëvendësimi i deputëtëve ka ndodhur në mënyrë të paligjshme kur kodi ka procedura të qarta. Presidenca është kala për mbrojtjen e kushtetutës, ndaj mazhorancës, opozitës, ndaj vagabondëve ndërkombëtarë që e dinë që kushtetuta e Shqipërisë që mund të përdhoset. Deri më 24 korrik të 2022 është kala nuk afrohet njeri për kushtetutën,” tha Meta.
Presidenti foli edhe për Reformën në Drejtësi duke nxitur palët ta përfundojnë sa më shpejtë megjithëse sipas tij ka probleme më të mëdha. Ai përsëriti edhe njëherë se vendit i duhet zgjedhje të parakohëshme parlamentare, lokale dhe për presidentin. Në lidhje me sistemin elektoral Meta la të kuptohet se është në favor të një ndryshimi.
“Shqipërisë i duhen zgjedhje të lira dhe të ndershme dhe sistem të vërtet parlamentar demokratik, pra lidhje të deputetëve me qytetarët,” tha ai. /Opinion.al
