Kutia e zezë e helikopterit të Forcave të Armatosura të rrëzuar në Liqenin e Shkodrës do të sillet në Tiranë.
Ajo është marrë në dorëzim nga Prokuroria e Shkodrës.
Do jenë ekspertët shqiptarë në bashkëpunim me ata të Eucopter dhe ekspertët amerikanë që do të punojnë për të deshifruar informacionin e saj.
Materialet e regjistruara pritet të zbardhin motivin e rrëzimit të helikopterit EC 145 që u rrëzua në zonën e Grizhës mesditën e së mërkurës, në 6 Prill.
Nëse nuk do arrihet të deshifrohet informacioni, atëherë kutia e zezë do të dërgohet për ekspertizë më të mirë në Francë.
Aktualisht grupi hetimor i ngritur për këtë çështje po shikon se në çfarë gjendje është ajo dhe a është dëmtuar informacioni që gjendet në të.
Bashkë me kutinë e zezë, në duart e ekspertëve janë edhe disa pjesë të motorit, që u nxorrën një ditë më parë.
Në Liqenin e Shkodrës vazhdojnë përpjekjet për të nxjerrë nga uji mbetjet e helikopterit.
Rrezja e zonës se rrethuar është zgjeruar nga 300 në 700 metra.
Në pritje të informacionit të kutisë së zezë, Prokuroria e Shkodrës ka regjistruar procedimin për veprat penale të lëvizjes së trupave pa të drejtë, si dhe shkelje e rregullave të fluturimit ajror të parashikuara nga nenet 48 dhe 83 i kodit penal ushtarak.
Neni 83 parashikon dënim deri në 15 vjet burg, ndërsa neni 48 parashikon që komandanti që urdhëron lëvizjen e trupave ose mjeteve ushtarake pa autorizim, urdhër apo mision të veçantë, dënohet me nxjerrje në lirim ose deri në 2 vjet heqje lirie. Në të dyja rastet, sipas prokurorisë, hetimi përfshin strukturat ushtrake eprore të pilotëve të vdekur, pasi ata nuk mbajnë asnjë përgjegjësi derisa kanë humbur jetën.
Regjistrimi me këtë akuzë është bërë nga prokuroria pas dyshimeve se mjeti fluturues mund të mos ketë pasur stërvitje apo mision.
Tv Klan
