Kryeministri i Kosovës, Albin Kurti, pas mbledhjes së qeverisë, ka folur në lidhje me takimin që pati në Bruksel me presidentin e Serbisë, Aleksandër Vuçiç, ndërmjetësuar nga i dërguari i Posaçëm për dialogun, Miroslav Lajçak.
Kurti deklaroi se në Bruksel shkoi për marrëveshjen finale që në qendër ka njohjen reciproke mes Kosovës dhe Serbisë, ndryshe nga presidenti serb, Aleksandër Vuçiç, që shkoi vetëm për çështjen e targave.
“Presidenti i Serbisë kishe ardhur në Bruksel jo për propozimin franko-gjerman por për çështjen e targave. Më 18 gusht në takimin që kemi pasur ishin dy pika të rendit të ditës, pika e parë korniza e përgjithshme e marrëveshjes dhe pika e dytë me çështjet aktuale”.
“Unë e mbështeta strukturën aktuale të takimeve sepse liderët shtetërorë thirren për të bërë marrëveshje e madhe e finale. Unë nuk jam as komdant policie, as shef kadastri, as zyrtar dogane që të merrem me gjithfarë çështje teknike të cilat dalin përgjatë bisedimeve. Ne jemi shtet me institucione përkatëse të cilat kanë shumë profesionistë të zot që i zhvillojnë këso lloj bisedimesh. Unë shkoj atje për marrëveshjen finale ndërkombëtarisht e ligjërisht të obligueshme për normalizimin e plotë të marrëdhënieve me njohjen reciproke në qendër” tha Kurti.
Kurti deklaroi se komuniteti serb në Kosovë është më i mbrojturi dhe më i privilegjuari në Kushtetutë, madje, aipas tij të drejtat për pakica, siç ofron Kushtetuta e Kosovës, nuk ofrohen as në kushtetuta të shumë shteteve të avancuara të BE-së.
“Vendimi ynë për targat nuk mund të jetë objekt negocimi, është vendim i Qeverisë. Ne kemi dashur t’u japim shans kohës së implementimit. Tri javët e para qortime asnjë incident, dy muaj gjobitje, jo konfiskim. Ne nuk e negociojmë vendimin”, ka thënë ai. “6 muaj është negociuar për targat, e në fund kanë qenë 8 opsione”.
“Nja tri kanë qenë më të përshtatshme për ne 5 jo, por Serbia s’e ka pranuar asnjë. Ne luteshim të mos vinte puna te ato pesë, por tek këto tri por nuk erdhi tek asnjëra. Vendimi ynë erdhi 2 muaj pas negociatave 6-mujore. Ne nuk kënaqemi derisa gjobisim. Nuk është dëshirë, është detyrë”, tha Kurti.
