Mediat sociale po bëhen çdo ditë e më ndikuese në jetën e njerëzve. Prezenca e tyre në përditshmëri është bërë e pashmangshme, dhe kjo për vetë faktin se këto media iu lejojnë njerëzve të shfaqin anën më të mirë të vetes së tyre. Kjo mund të jetë edhe shkak për disa probleme të mëdha mendore thonë ekspertët.
Në vitin 2017, Instagram u cilësua media më e keqe sociale për shëndetin mendor. Sa më shumë të navigosh nëpër Instagram aq më shumë gjen foto pushimesh luksove, veshjesh firmato, apo të tilla gjëra si këto të cilat të krijojnë idenë që shumë njerëz po jetojnë jetën e ëndrrave. Sikur të mos mjaftoj kjo, kohët e fundit Instagram është cilësuar si media më narciste gjithashtu.
Të gjithë kanë tendencën që në këtë rrjet social të shfaqen të lumtur dhe të buzëqeshur, sepse çdo njeri poston momentet më të bukura. Mos prisni që dikush të postoj fotot duke qarë në divan pas një ndarjeje të keqe. Këtu fillon edhe problemi i shëndetit mendor. Nëse një person që po kalon një fazë depresive sheh vetëm foto të buzëqeshura ose të lumtura, në vend që të kërkojë ndihmë, gjëja e parë që do bëjë është të hedh foto me buzëqeshje të shtirur.
Standartet e instagramit gjithashtu mund të shkaktojnë pasiguri të mëdha në përditshmërinë tuaj, ndaj mos merrni të mirëqënë asgjë që shihni aty./Opinion.al
