Në ditën kur maxhoranca votoi shembjen e Teatrit Kombëtar, kryeministri Rama publikoi nga foltorja e parlamentit një shkresë të Ministrisë së Ekonomisë, Tregtisë dhe Energjitikës të vitit 2013, ku ish-Ministri i linjës Florion Mima i kërkonte bashkisë së Tiranës prononcim për përfshirjen në procesin e privatizimit të Teatrit të Metropolit ose dikur “Ish-Estrada e Shtetit”.
Kjo shkresë e Ministrisë së Financave lidhej me një kërkesë për privatëzim drejtuar kësaj ministrie nga Astrit Veliaj, Administrator i “Albanian University”.
Siç vërtetohet edhe nga shkresat kthim-përgjigje që publikoi Rama sot nga foltorja e parlamentit, Bashkia e drejtuar në atë kohë nga Lulzim Basha sot kreu i opozitës, ka pranuar se objekti është në listën e inventarit të Bashkisë dhe se ishte dakord për privatëzimin, por kjo gjë po sipas kësaj bashkie i takonte si vendim Këshillit të Ministrave.
Në fakt siç edhe dihet, Teatri i Metropolit vazhdon të jetë edhe sot në inventarin e Bashkisë së Tiranës, çka tregon se maxhoranca e djeshme pati një tjetër qasje ndaj objekteve të artit.
Kryeministri Rama kërkoi sot me publikimin e shkresës së vjetër që të përlyejë njëkohësisht edhe opozitën pra maxhorancën e djeshme, në aferën e tij për shembjen e institucioneve artistike, punë të cilën Rama ka të paktën 20 vite që e vazhdon me zell të pashoq.
Kujtoj këtu që në periudhën e Ramës kryetar Bashkie, u zhdukën me radhë Kinema “Partizani”, “Republika”, “Ali Demi” etj.
Madje ndryshe nga shkresa e vitit 2013 ku ishte administratori i “Albanian University” Astrit Veliaj që kërkonte privatizimin e Teatrit të Metropolit, gjë që nuk u konkretizua, në rastin e Teatrit Kombëtar është vetë Rama që ka pranuar me zë dhe figurë që ka qenë ai që i ka kërkuar firmës “Fusha SHPK” të shembë Teatrin Kombëtar dhe të ndërtojë aty Kulla.
Pra ndryshimi midis maxhorancës së djeshme dhe asaj të sotme, në qasjen ndaj institucioneve ku zhvillohet arti, është i qartë.
Është e sigurtë se nëse do rrëmosh nëpër arkivat e ministrive do gjesh plot shkresa të tilla si ajo që nxorri Rama sot, por historia dhe dikush tjetër në një shtet ligjor do të gjykojë për aktin në vetvete dhe jo kërkesat për prononcim që janë pjesë e burokratike e çdo institucioni.
Dhe sot u vulos pikërisht akti i Shembjes së Teatrit Kombëtar, dhe jo prononcimi. Dhe ky është akti më i rëndë që i ka ndodhur një institucioni artistik, të paktën në 75 vitet e fundit./ Dritan Laci Opinion.al
