Teksa opozita proteston prej më shumë se një muaji, në rrugët e Tiranës janë parë mëngjesin e kësaj të mërkure disa thirrje për ish-kryeministrin Sali Berisha.
Në stacionet e autobusëve, shtyllat e tensionit apo vende të tjera janë ngjitur fletë ku bëhen thirrje për Berishën, teksa i kërkohet të rikthehet.
“O Sali o hero gjithë Shqipëria ty të do” apo “Kthehu Legjendë”, shkruhet në këto fletë.
Në 26 qershor të 2013 Berisha la drejtimin e partisë.
“Unë jam këtu para jush, jo për të komunikuar rezultatin e zgjedhjeve, sepse ai tashmë është i qartë për cdo njeri dhe natyrisht i pranuar nga unë dhe Partia Demokratike, por jam para jush për t’iu njohur me vendimin tim. Unë kam qenë gjithnjë i vendosur për t’iu bindur plotësisht verdiktit të sovranit, i cili foli qartë në këto zgjedhje. Unë iu përkas atyre politikanëve, që besojnë se sovrani nuk gabon, që besojnë se ai ka gjithnjë të drejtë. Duke marrë përgjegjësitë, që vërtet më takojnë, me një vendim të prerë kam vendosur të jap dorëheqjen nga të gjitha funksionet e mia në forumet e PD-së, të jem thjesht njëri prej jush, anëtar i PD-së dhe deputet i saj”, deklaroi në atë kohë Berisha, ndërsa sa herë pyetet nga gazetarët për një rikthim, ai e ka mohuar kategorikisht./Opinion.al
