Kryeministri Edi Rama ka njoftuar pasditen e sotme se helikopterët e forcës sonë ajrore, Black Hawk, do të kenë hangarin e tyre të dedikuar në Bazën Ajrore të Farkës.
Përmes një video të shpërndarë nga kreu i qeverisë, sqarohet se në këtë hangar do të mund të kryhen shërbimet e mirëmbajtjes për këto helikopterë.
Shefi i Mirëmbajtjes së Black Hawk, Ertion Kodra, në videon e Ramës, shprehet se ky hangar do të mund të strehojë deri në 4 helikopterë, ku dhe do të marrë shërbimet e nevojshme.
“Ky hangar do të ndihmojë shumë në ngritjen e mirëmbajtjes së helikopterëve Black Hawk, duke ofruar kushte më të mira pune dhe shërbimi, për efektivitetin e mirëmbajtjes. Hangari është për të akomoduar deri në 4 helikopterë. Jo vetëm për akomodimin e tij, por këtu do të bëhet dhe mirëmbajtja ditore, si dhe proceset e troubleshoot-ing, ose difekteve dhe riparimi i tyre”, siç shprehet Kodra.
Rama shkruan se ndërtimi i këtij hangari sapo ka përfunduar dhe një investim i tillë, rrit operacionalitetin e Bazës së Farkës.
“Helikopterët Black Hawk të Forcës sonë Ajrore do të kenë “shtëpinë” e tyre të dedikuar në Bazën Ajrore të Farkës, aty ku sapo ka përfunduar ndërtimi i hangarit të ri.
Investimi në infrastrukturë dhe modernizim do të rrisë operacionalitetin e Bazës së Farkës, duke ofruar të gjitha lehtësirat jo vetëm për kryerjen e punimeve të mirëmbajtjes së helikopterëve, por edhe përmirësimin e kushteve të punës për pilotët dhe teknikët tanë”, shkruan Rama në rrjete sociale.
