Monika Kryemadhi që kryeson listën e LSI në Elbasan ka bërë një deklaratë të ashpër ndaj Taulant Ballës që kryeson listën e PS në këtë qark. Kryemadhi thotë se Balla po blen vota dhe po shantazhon me polici votuesit e LSI.
Elbasani, është një nga qarqet më të nxehta aty janë raportuar sot disa incidente në vogla, si bllokim të qendrave të votimit apo rrahje mes komisionerëve e vëzhguesve, të PS, LSI e PDIU. Në Elbasan ishte sot edhe kryeprokurori Adriatik Llalla.
Deklarata e Kryemadhit në facebook
Shpreh keqardhjen që Dega e Rilindjes në Elbasan, me një gjuhë të papërshtatshme dhe e frikësuar për rezultatin e pritshëm të zgjedhjeve më akuzon mua dhe bashkëpunëtorët e mi për incidente që mbajnë autorësinë e disa rilindasve që drejtohen nga Taulant Balla. Këtij të fundit i kujtoj dhe njëherë se çdo përpjekje për të ndaluar dhe shoqëruar në polici njerëz të pafajshëm është krejt e kotë sepse çdo votues i qarkut te Elbasanit, do apo nuk do Taulanti apo levat e tij në policinë e shtetit, do ta shprehë vullnetin me votën e lirë.
Prej një muaj deputeti Balla ka denoncuar të paktën 300 të rinj,kryesisht studentë dhe gjimnazistë apo dhe të moshuar të njohur si përkrahës të LSI,vetëm e vetëm që ata mos të jenë të lirë ditën e votimit. Sikundër ka vijuar i qetë të shoqërohet nga kriminelët që lëvizin me makina të blinduara dhe pa targa dhe kërcënojnë çdo ditë qytetarët. Çdo përpjekje për të trembur të moshuarit apo gjimnazistët është e kotë, çdo tentativë për të arrestuar të pafajshëm është një farsë, sepse sado pushtet të kesh, popullin nuk e arreston dot.
Ne distancohemi nga deklaratat e Taulant Ballës dhe i kujtojmë se bandë kriminale nuk janë të rinjtë e LSI por banda e tij e kryesuar nga kryetari i bashkisë së Librazhit Kastriot Gurra që ushtron shantazhe deri me jetë, apo ish truproja e tij që sot është nënkryetari i bashkisë së Librazhdit Avni Mema, apo për shpërndarjen e parave që kryesohet nga Kasem Balla,babai i deputetit dhe Vladimir Balla, vellai i Taulantit. I kujtoj Taulantit kryetarin e bashkisë së Belshit që dhe sot kërcënon njerëzit në qendrat e votimit, apo kamionin me miell që u kap duke u shpërndarë miell zonave te varfra në Gramsh në këmbim të votës.
Ndaj sot Taulantit dhe falangave të tij në policinë e shtetit më duhet ti paralajmëroj për herë të fundit të qendrojnë larg votuesve dhe vullnetit të tyre, sepse kjo është një ditë e shënuar për popullin shqiptar. Dhe askush, sado të abuzojë me pushtetin dhe forcën nuk do mund ta prishë dot. Vullneti i popullit të Elbasanit është sot në kutitë e votimit dhe çdo votë do të numërohët si vendimi i qytetarëve për të larguar krimin nga policia dhe politikën nga krimi. Eh mor Taulant, nga kërkimi i motrës vajte te kërkimi i votës. Prandaj po të përshëndes me “Taulanti kërkon motër”
Incidenti në Librazhd
Në KZAZ 52, në Librazhd, kryetarja Valbona Balla ka pasur konflikt me njërin prej anëtarëve të LSI-së. Është dashur ndërhyrja e forcave të policisë për të shmangur përshkallëzimin e situatës.
Incidenti në Cërrik
Mirela Muçaj, nga PS, ka bërë një kallëzim penal, ndaj një personi që e ka dhunuar teksa monitoronte procesin zgjedhor.
“Morëm njoftim se në një qendër zgjedhore pati probleme dhe shkuam së bashku me përfaqësuesit e PD-së dhe PR-së, unë përfaqësoj PS-në. Në qendër kishte grupime njerëzish, të cilët i njoftuam se nuk lejohej qëndrimi aty. Pati një debat mes sekretarit dhe anëtarëve. Në qendër pati votues dhe vëzhgues. Në momentin që iu drejtova personit me të cilin u konfliktova, i cili nuk kishte autorizim, i thashë të dilte jashtë. Iu drejtova dhe komisionit për ta nxjerrë jashtë pasi ai kishte votuar. Personi në fjalë,Ylli Perisnaka ishte simpatizant i LSI-së dhe punonjës në Bashkinë e Cërrikut. Kur dola jashtë pasi njoftova patrullën e policisë, ai më shahu, më fyeu dhe më kërcënoi”, tha ajo.
