Kryetarja e LSI, Monika Kryemadhi tha se opozita tani duhet të marrë përsipër zgjidhjen e krizës politike. Në një deklaratë për mediat, ajo tha se 30 qershori ishte një dhunim i hapur i Kushtetutës dhe i Shtetit ligjor, por edhe një tentative e dështuar e ngritjes së një shteti monist.
“Refuzimi total nga shqiptarët është një sinjal madhor, por është edhe një përgjegjësi për gjithë forntin opozitar, sepse sfidat tona nuk janë vetëm denoncimi i inkrimimit të Edi Ramës, sot sfidat tona janë shumë më të mëdha. Shqiptarët folën qartë dje me mospjesëmarrjen e tyre masive. Fjala e tyre tashmë është përgjegjësi e madhe për ne. Opozita e bashkuar me gjithë faktorët politikë dhe jo politikë duhet të marrë përsipër zgjidhjen e krizës në të cilën Rama dhe klika e tij kanë futur Shqipërinë”, tha kryetarja e LSI.
Sipas saj opozita duhet të punojë fort për të fituar besimin e tyre.
“Të gjithë së bashku kush më shumë e kush më pak kemi lejuar si padashje për të ngritur në majat e ekzekutivit një njeri të papërgjegjshëm por mbi të gjitha të lidhur me krimin e organizuar. Ne e kemi kuptuar mesazhin 85% të shqiptarëve dhe duhet të punojmë fort për të. Lufta kundër papunësisë, varfërisë, drejtësisë që qeveria i bën shqiptarëve në pronat e tyre”./ Opinion.al
