Mesa duket rezultatet e 30 qershorit i kanë dhënë më shumë siguri opozitës. Në një intervistë televizive, kryetarja e LSI, Monika Kryemadhi deklaroi se ajo nuk ka frikë të hyjë në zgjedhje me Edi Ramën sepse ai sipas saj është i vetmi njeri që mund ti bëj bashkë shqiptarët që ta rrëzojnë me votë.
“Unë me Edi Ramën nuk kam frikë të shkoj në zgjedhje. Unë si Monikë, jo. Nuk kam frikë sepse sot vetëm një njeri si Edi Rama mund ti bëj bashkë shqiptarët që ta rrëzojnë me votë. Ne sot jemi vendosur përballë një presioni. Treguam se edhe kur bën zgjedhje vetëm i manipulon. Nuk po arrijmë dot të balancojmë votat. U bënë zgjedhjet në Greqi, fituesi u betua direkt pas rezultatit”, tha Kryemadhi.
Ajo foli edhe në lidhje me dekretin e presidentit Meta për datën e zgjedhjeve të 13 tetorit. Për Kryemadhin kjo është datë e cila nuk është ankimuar në asnjë institucion dhe kështu që mbetet në fuqi. Më tej ajo shtoi se asnjë gjyqtar nuk do ta merrte përsipër shkeljen e dekretit presidencial.
“Zgjedhjet sipas dekretit të presidentit janë më 13 tetor dhe nuk ishin më 30 qershor. Kolegji Zgjedhor ka hedhur poshtë vetëm kërkesën e Idejet Beqirit dhe jo dekretin e presidentit. Si PD dhe opozita jemi për çështjen e standardeve. A është 13 tetori a 24 tetori është diçka që duhet ta diskutojmë të gjithë më presidentin e Republikës”
“Kush është ai gjyqtar i cili merr përsipër shkeljen e dekretit presidencial. Nga ana ligjore 13 tetori, KQZ nuk e ka nisur procesin. Ne do i bëjmë një letër KQZ-së sepse çdo letër që do na kthejë KQZ do jetë një shpjegim por nëse Denar Biba do kërcënohet me vettingun e bashkëshortes së tij, kjo është çështje tjetër”, tha Kryemadhi. /Opinion.al
