Lëvizja Socialiste për Integrim ka mbledhur sot Komitetin Drejtues, prej nga Monika Kryemadhi dha një mesazh të drejtpërdrejtë për kryeministrin Edi Rama.
“Kam një mesazh të drejtpërdrejtë për Edi Ramën. Meqenëse ka merak për LSI-në, po ia bëj të qartë që nuk është më kur ka qenë Ilir Meta kryetar Partie që kishte hall për dashuri dhe qetësi. Dashuria dhe qetësia për kriminelin ka mbaruar, dashuri dhe qetësi me atë njeri që ka veshur me të zeza nënat e shqiptarëve, do të mbarojë. Mund të ndalen burrat, por jo gratë e këtij vendi. Të mos guxojë të cenojë asgjë të shqiptarëve”, tha Kryemadhi.
Gjatë fjalës së saj, ajo deklaroi se anëtarët e kryesisë dhe ish-deputetët e LSI-së do të jenë në bazë, për t’u takuar me njerëzit për t’u shpjeguar rolin e rëndësishëm që ka pasur Lëvizja Socialiste për Integrim gjatë tetë viteve qeverisjeje.
“Njerëzit e LSI-së duhet të zgjohen nga gjumi, të takojnë njerëz që kanë rënë pre e propagandës së Edi Ramës, që nuk e dinë se çfarë roli ka pasur LSI gjatë tetë viteve. Roli i LSI-së në qeverinë me PS ka qenë kyç për integrimin, ka qenë vendimtar roli i LSI-së për frenimin e korrupsionit në radhët e Partisë Socialiste, rol vendimtar për ndaljen e gjobave ndaj biznesit, për lirinë e mediave”, tha Kryemadhi.
Kjo deklaratë e Monika Kryemadhit vjen një ditë pasi kryeministri Edi Rama tha në Parlament se LSI mund ta shpëtojë Shqipërinë vetëm duke mos marrë pjesë në zgjedhje, pasi nuk do të ketë kush t’i blejë e t’i shesë votat.
“Le të flasë Myslimi, që në zgjedhjet e fundit kishin frikë mos ua blinte votat LSI-ja. Edhe ne nuk kemi pasur probleme votash me PD-në, por me LSI-në. Del “daja Titi” që këndon këngën të shpëtojmë Shqipërinë nga ata që blejnë votën. Po shpëtojeni pra, gjysmën e punës e keni bërë, keni dalë në rrugë, ikni në shtëpi tani. Të rrijë LSI-ja një turn pushim, ta shihni se nuk ka blerje votash, nuk ka shitje votash. Se nuk ka kush i blen, nuk ka kush i shet. Bëjeni, shpëtojeni Shqipërinë”, tha Rama dje, fjalë që u duartrokit nga deputetët e majtë./Opinion.al
