Deputeti i Partisë Socialiste, Besnik Baraj, i ftuar në “Abcnews”, është shprehur se Presidenti Ilir Meta nuk po i shikon ngjarjet politike nga posti që mban, por si një ish-kryetar i LSI.
Baraj tha se Metës i duhet shumë forcë për të dalë mbi vetveten, pasi LSI e vë shpesh herë atë në vështirësi. Deputeti socialist tha se Presidenti duhet të jetë i besueshëm në qëndrimet që mban dhe jo të bëhet pjesë e krizës politike.
Teksa bëri një krahasim mes protestave të Partisë Socialiste në kohën që ishte në opozitë me protestat e Partisë Demokratike, Baraj tha se ato ndryshojnë pasi protestat e PS japin mesazh paqeje dhe stabiliteti.
“Presidenti pikërisht për situata të tilla mbahet mend në Shqipëri sepse roli i tij në periudha të qeta është më shumë honorifik dhe kur krijohen situata të tilla kritike është mirë ta luajë atë rol, por ai ka një problem që lidhet me historinë e tij. Historinë e të qenit në krye të LSI-së. Ajo sikur e komplekson dhe herë pas here e bën që të mos jetë objektiv në qëndrimet e veta. I duhet shumë forcë për të dalë mbi vetveten, mbi historinë e vetvetes për të qëndruar mbi palët. Jo thjesht në mënyrë deklarative, por në substancë të vet, që ta luajë rolin e tij dhe të jetë i besueshëm realisht që kërkon zgjidhjen e këtij ngërçi. Zgjidhja e ngërçit nuk mund të bëhet palë, kur duhet të ikë kryeministri i zgjedhur me vota dhe për të marrë rrugëzgjidhje.
U bë kohë që kjo është një ngjarje shoqëruese për ditën në parlament. Ajo që të them të drejtën ndihem keq kur kaloj mes rreshtave të forcave të ruajtjes së rendit është pikërisht fakti te sjellja e këtyre protestave. Po të shikoni te protestat që ka zhvilluar PS dhe PD ka një kontrast të thellë dhe kontrasti u manifestua edhe herën e fundit, ditën e Kongresit kur u zhvillua një festë kur morën pjesë qytetarë të Tiranës, familjarë. Diferenca është thjeshtë në kulturën dhe mesazhin që jep lidershipi i PD-së dhe mesazhet që jep lidershipi i PS-së. Mesazhet që japim ne janë mesazhet paqësore të bashkëpunimit, të ruajtjes së qytetit, të mos veprimit të në mënyrë agresive dhe për fat të keq këta e kanë manifestuar agresivitetin e tyre edhe kur kanë qenë në pozitë, por edhe kur janë në opozitë.
Për sa i përket rikandidimit të Erion Veliajt për Bashkinë e Tiranës, ai tha se, “Harmonia që ka gjetur Erion Veliaj në shërbim të qytetit dhe harmonia me pushtetin qendror është mbresëlënëse. Nuk ka ndodhur ndonjëherë në drejtimin e Tiranës një harmoni e tillë. Edhe PD dhe Lulzim Basha e ka pasur në një hark kohor 2-vjeçar. Imagjinoni po të krahasojmë Lulzim Bashën e dy vjetëve të para ku kryeministër ishte Sali Berisha dhe Erion Veliaj, kur dy vitet e para ishte Edi Rama. Shikoni çfarë ndryshimi dramatik ka pësuar Tirana- u shpreh Baraj./ Opinion.al E.Xh.
