Midis rasteve që u diskutuan mbrëmjen e djeshme në “Opinion” mbi atë çfarë po ndodh me drejtësinë në Shqipëri dhe shumë prej vendimeve të saj të dyshimta, ishte edhe rasti i Kostandin Xhuvanit, djalit të i ish-deputetes socialiste Luiza Xhuvani. Një tjetër rast që tregon për standardet e dyshimta me të cilat punon çekani i drejtësisë në Shqipëri. Në shkurt të vitit 2011 Kostandin Xhuvani vrau 26 vjeçarin Alfred Musabelliu. Edhe pse një ngjarje e rëndë Gjykata e dënoi Xhuvanin me dy vite burg, pasi e konsideroi vrasjen vetëmbrojtje. Por edhe këto dy vite dënim Xhuvani nuk i bëri të plota, pasi përfitoi sa mundi nga drejtësia, e cila pranoi pendesën e tij. Prokuroria kërkoi tre vite burg, aq sa dha edhe gjykata, por kjo e fundit i pranoi gjykimin e shkurtuar, duke i ulur masën e dënimit 1 vit. Ky vendim nuk u apelua nga prokuroria, e cila mori masën e kërkuar, ndonëse policia e kishte referuar ngjarjen e vitit 2011 si vrasje me dashje. Në nëntor të vitit 2014, Xhuvani është pjesëmarrës kryesor në një ngjarje të ndodhur në Rrugën e Elbasanit ku mbetën të vrarë 4 persona. Edhe në këtë rast Xhuvani mundi tia hedhë dënimit të përjetshëm. Prokuroria dhe Gjykata kërkuan fillimisht burgim të përjetshëm për secilën nga katër vrasjet, por më pas, për shkak të gjykimit të shkurtuar vendimi shkoi në 35 vjet heqje lirie.
