Koronarovirusi është paraqitur tek 4 persona në Australi të cilët kishin qenë së fundmi në Kinë ku edhe është përhapur ky virus.
Tre burra të moshës 53, 42 dhe 35 vjeçare u diagnostikuan në spitalin e Sidneit me këtë virus. Dy prej tyre kishin udhëtuar në qytetin Wuhan ku koronarovirusi ka shënuar përhapje të madhe.
Rreth 830 persona janë infektuar me koronavirus në Kinë, 41 prej të cilëve kanë vdekur. Autoritetet kanë ndaluar udhëtimet në 13 qytete në provincën Hubei, që është qendra e shpërthimit të virusit.
Zyrtarët në Australi paralajmëruan se ky virus mund të ketë përhapje më të madhe në vend.
Kryeministri Australian, Scott Morrison tha përmes një njoftimi se shteti ka siguruar 10 milionë maska për t’u mbrojtur nga virusi.
Sipas ekspertëve, virusi përhapet nga kafshët tek njerëzit, por nuk është përjashtuar mundësia e transmetimit midis njerëzve. Virusi i ri mund të shkaktojë sëmundje nga ftohja e zakonshme deri te Sars-i.
