Partia Demokratike ka denoncuar krijimin e Koorporatës së Investimeve si një veprim që e bën kryeministrin e vendit Edi Rama pronar të çdo pasurie të paluajtshme në vend.
Në një dalje për mediat, Jorida Tabaku tha se me anë të këtij projektligji, Rama pa i dhënë llogari askujt, mund ta përdorë Koorporatën për të shpërndarë pronat publike tek të njëjtët oligarkë apo tek persona të paidentifikuar. Ajo sqaroi se sipas këtij ligji, Korporata e Investimeve është e lirë të marrë kredi, e pakontrolluar nga askush dhe në rast të mosshlyerjes së saj, të humbasë pronën publike që do të vendosë si garanci.
“Me një skemë flagrante korrupsioni, projektligji shmang çdo përgjegjësi për dështimin e investimeve të Koorporatës, për pasojë, me lejen e Edi Ramës, prona publike i kalon menjëherë bankës, duke realizuar tjetërsimin e pronës publike nga shteti tek privatët. Nëse ky ligj miratohet në Parlamentin e dalë nga vota e blerë me paratë e krimit të organizuar dhe të oligarkëve të Edi Ramës, Partia Demokratike angazhohet ta anulojë atë në ditën e parë të qeverisë së saj. Askush nuk ka për të gëzuar pasuritë e grabitura të shqiptarëve”, ka thënë Jorida Tabaku.
Ajo denoncoi faktin se Koorporata e Investimeve përjashtohet nga ligji i Prokurimeve Publike, zhduk konkurencën e lirë, cenon rëndë marrëveshjen e Stabilizim Asociimit me Bashkimin Europian dhe se ligji shkel në mënyrë flagrante Kushtetutën dhe autonominë e pushtetit lokal./Opinion.al
