Bujar Leskajt i mbaroi mandati 7 vjeçar në krye të Kontrollit të Lartë të Shtetit më 9 janar të këtij viti. Ai u largua duke ia deleguar kompetencat zv/Kryetares Lindita Milo (Lati). Por zgjedhja e një drejtuesi të ri po prodhon një krizë të re dhe përplasje mes Presidentit dhe mazhorancës së majtë. Deri më tani është rrëzuar një kandidaturë e Metës dhe pritet të rrëzohet dhe kandidatura e dytë.
Më 5 Nëntor, Meta nxorri dekretin për të emëruar gjyqtaren Vitore Tusha në krye të KLSH-së. Me votat e PS kandidatura e Tushës u rrëzua në parlament në dhjetor 2018. Sipas të majtëve, Tusha nuk është eksperte e fushës, pasi për këtë pozicion duhet ekonomist dhe jo jurist.
Më datë 19 Janar, Meta propozoi emrin e dytë. Ai është Bahri Shaqiri, ish-drejtor i SHISH dhe aktualisht këshilltar i Presidentit. “Bahri Shaqiri plotëson të gjitha kushtet dhe kriteret ligjore për t’u emëruar në këtë pozicion, si dhe është një kandidaturë me eksperiencë në drejtimin e institucioneve”, thuhet në njoftimin e Presidencës.
Por mazhoranca e kundërshton akoma dhe më fort kandidaturën e Bahri Shaqirit. Ende pa shkuar në Parlament, reagon Ulsi Manja duke e quajtur Shaqirin njeriun e LSI-së: “Përtej faktit të të bërit politikë, sinqerisht nuk arrij të kuptoj pse qenka kaq e vështirë për ta lexuar shqip në gërmë dhe frymë Kushtetutën e RSH? Kandidatura e Bahri Shaqirit për Kontrollin e Lartë të Shtetit, përveçse është një kandidaturë me profil të lartë politik pasi vjen nga forumet drejtuese të LSI, ka edhe një problem serioz kushtetues pasi nuk ka punuar në financat e vendit”, tha ai.
Teksa bënte nderime tek busti i Ismail Qemalit, Meta iu përgjigj sot mazhorancës, duke thënë se është bazuar në Kushtetutë kur e ka propozuar Shaqirin për në KLSH.
Gazetari: Zoti Meta, a ishte Kushtetuta e para kur firmosët për dekretin e zotit Bahri Shaqiri? Mazhoranca thotë se ka shkelje kushtetuese, sepse nuk plotëson një nga kriteret?
Meta: Kushtetuta, interesi kombëtar dhe interesi publik janë të vetmet që më udhëheqin në veprimet e mia dhe në aktet e mia.
/Ri-De
*Foto ilustruese
