Kreu i Partisë Demokratike, Lulzim Basha është paraqitur në prokurorinë e Tiranës rreth orës 10 tëkësaj të mërkure, pasi është i pandehur në lidhje me kontratat e lobimit. Dy ditë më parë, Prokuroria e Tiranës ka dorëzuar një shkresë në policinë e kryeqytetit ku kërkonte shoqërimin e detyrueshëm të Lulzim Bashës në datën 20 Qershor.
Basha nuk u paraqit në Prokurori të hënën, ku pritej t’i komunikohej akuza për falsifikim të formularëve dhe pastrim parash në lidhje me kontratat e lobimit që ka firmosur në Amerike.
Gjatë paradites së të hënës Basha, përmes një letre drejtuar organit të akuzës, e konsideron në shkelje të ligjit thirrjen në prokurori. Ai theksonte se, nuk i janë vënë në dispozicion provat e reja të mbërritura nga SHBA.
“Prokuroria nuk ka asnjë gjë të re që nga 25 maj, kjo akuzë është montuar në zyrën e Edi Ramës. U njoha me akuzën që nuk është akuzë. S’ka asnjë provë, s;ka asnjë transaksion parash për pastrim parash, nuk ka ka snjë rus të vetëm. Dosjen nuk e kishin gati sepse nuk e kishin gati. Është një çështje e montuar në zyrën e Edi Ramës. Ajo që është ndryshe nga 25 maj është se plasi skandali i Bild. Kjo është hera e 5 që më thërrasin, sa herë që plasin skandalet e qeverisë në lidhje me krimin”, tha Basha për gazetarët.
Çështja e pagesave për lobim të kryera nga ana e PD-së u hap në nëntorin e vitit 2017, kur firma lobuese amerikane ‘Muzin Capitol Partners’ plotësoi me informacione shtesë deklarimet e saj të detyruara me ligj për Departamentin e Drejtësisë.
Sipas deklarimeve të kompanisë ‘Muzin’ ajo ka marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017: pagesa e parë mban datën 24 mars 2017 dhe është bërë nga firma ‘Biniatta Trade LP”, me një vlerë prej 150 mijë dollarësh, dy pagesat e tjera janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë. Nga këto deklarime të firmës Muzin, vetëm ajo prej 25 mijë dollarësh, është pranuar nga kryetari i PD-së, të jetë paguar nga Partia e tij.
Partia Demokratike nuk ka pranuar asnjëherë lidhjet me firmën ‘Biniatta Trade LP”, e cila rezulton e regjistruar në Edinburg të Skocisë dhe është në pronësi të një zinxhiri kompanish të regjistruara në Belizë – një shtet i Amerikës Qendrore, i njohur si parajsë fiskale e që fije të ndryshme e lidhin dhe me shtetas rus. PD ka deklaruar publikisht se “nuk ka thyer asnjë ligj, as shqiptar, as amerikan dhe të asnjë vendi tjetër. Partia Demokratike nuk ka patur e nuk ka asnjë lidhje direkte apo indirekte me individë apo kompani ruse”.
Lidhur me pagesën prej 500 mijë dollarësh që Muzin ka deklaruar se janë bërë nga PD, zoti Basha ka dhënë shpjegime kontradiktore. Në mars të vitit të shkuar ai ishte shprehur se “nuk është bërë asnjë pagesë e tillë nga Partia Demokratike”. Ndërsa në nëntor të 2017 e kishte shpjeguar këtë shumë me pagesën e kryer falë një mbledhje fondesh nga një numër i madh shqiptaro amerikanësh, por që nuk kishte kaluar përmes partisë. Nuk dihet se çfarë provash Prokuroria ka në dipozicion, dhe nëse ajo ka siguruar dokumenta të reja./ Opinion.al
